افغانستاننینگ سابق جمهور رییسی حامد کرزی بوگون هراتده نمایشلر چاغیده صادر بۉلگن زۉروانلیکلردن خواطرده اېکنینی بیلدیردی.
کرزی بوگون کېچقورون (سهشنبه، ۱۹جوزا) ایکس اجتماعي ترماغیده نشر قیلگن بیاناتیده شوندهی دېدی: «جمعیتیمیز تینچلیک، قووانچ و دۉستلیککه بای حیاتگه محتاج.»
اونینگ قۉشیمچه قیلیشیچه، «افغانستاننینگ برچه یشاوچیلری، اینیقسه عیاللر تۉلیق حرمت قیلینیشی و اولر اوچون اۉز وطنیده مناسب حیات کېچیریش شرایطلری یرهتیلیشی ضرور.»
بوگون هراتنینگ جبریل منطقهسی اهالیسی طالبلرنینگ «امر به معروف و نهي از منکر» خادملری تامانیدن عیاللرنینگ حبسگه آلینهیاتگنیگه ناراضیلیک بیلدیریب نمایشگه چیقدی.
بیراق طالبلر اوشبو ناراضیلیک نمایشنی اۉق اوزیش و تیاقلردن فایدهلنیش آرقهلی ترقهتگن.
طالبلر کوچلرینینگ اۉق اوزیشی عاقبتیده کمیده تۉرت کیشی، جملهدن بیر باله جراحت آلگن.
شونینگدېک، تصدیقلنمهگن خبرلرگه کۉره، طالبان کوچلرینینگ نمایشچیلرگه قرهته اۉت آچیشی نتیجهسیده بیر عیال و بیر باله هلاک بۉلگن بۉلیشی ممکن. بیراق بو معلوماتلر مستقل روشده تصدیقلنمهگن.
سۉنگّی کونلرده طالباننینگ «امر به معروف و نهي از منکر» ادارهسی عیاللرنینگ حرکتلنیشیگه قۉییلگن چېکلاولرنی کوچهیتیریب، هراتنینگ تورلی حدودلریدن، جملهدن جبریلدن هم اۉنلب عیاللرنی گروه طلب قیلهیاتگن حجاب قاعدهلریگه رعایه قیلمهگنلیک عیبی بیلن حبسگه آلگن.
