محلي منبعلرنینگ «اطلاعات روز»گه معلوم قیلیشیچه، طالبان پنجشیر ولایتی خوفسیزلیک قوماندانلیگیده خدمت قیلهیاتگن۷۰ نفر سابق حربي و پنجشیرلیک یاشلرنی وظیفهلریدن چېتلتگن.
ایشانچلی منبعلر دوشنبه کونی (۱۸جوزا) تصدیقلشیچه، ایشدن بۉشهتیلگنلرنینگ برچهسی یاکه سابق جمهوریت دوریده خوفسیزلیک کوچلری صفیده خدمت قیلگن، یاکه پنجشیرنینگ اصلی اهالیسی حسابلنهدی.
طالبان اوشبو خادملرنینگ بۉشهتیلیشیگه سبب صفتیده بستلر اضافه بۉلگنینی کۉرستگن.
بیراق اسملری آشکار اېتیلیشینی ایستهمهگن منبعلرنینگ ایتیشیچه، اولرنینگ جمهوریت تیزیمیده خدمت قیلگنی همده اېتنیک و حدودي منسوبلیگی ایشدن چېتلهتیلیشنینگ حقیقي سببی دیر.
منبعلرگه کۉره، سۉنگّی پیتلرده پنجشیردهگی ینگی تشکیل اېتیلگن «شهرا کندکی» ترکیبیگه امنیه قوماندانلیگیگه علاقهدار پشتون یاشلر پولیس صفیگه قبول قیلینهیاتگن بۉلسه، تاجیک ملتیگه منسوب شخصلر تورلی بهانهلر بیلن خدمتدن چېتلشتیریلماقده.
طالبلر اۉتگن ییلی هم پنجشیر ولایتیدهگی پولیس ترکیبی نینگ۲۰ فایزینی «آرتیقچه بستلر» دېب اعلان قیلیب، بېکار قیلگن اېدی. اۉشنده ایشدن بۉشهتیلگنلرنینگ اکثریتی محلي اهالی بۉلگن.
طالبان افغانستانده حاکمیتنی قَیته قۉلگه آلگنیدن سۉنگ دستلب محلي اهالیدن کادرلر یالهگن، بیراق بیر مدت اۉتگچ، «حربي صفلرنی تازهلش» جریانینی باشلهگن.
حاضرگچه دوام اېتهیاتگن اوشبو جریانده ۲۰۰۱–۲۰۲۱ ییللرده طالبان نینگ جمهوریت حکومتی و ناتو کوچلریگه قرشی اوروشی دوریده طالبان صفیده خدمت قیلمهگن شخصلر وظیفهلریدن چېتلهتیب کېلینماقده.
