افغانستاننینگ زابل و پروان ولایتلریده یوز بېرگن ایکّی آغیر ترافیک حادثهسی عاقبتیده یېتّی کیشی جان بېرگن، سکّیز کیشی اېسه جراحت آلگن.
محلي منبعلرگه کۉره، سهشنبه کونی اېرتهلب (۱۹جوزا) زابل ولایتینینگ شاجوی اولسواللیگیده، کابل–قندهار قتناو یۉلیده ایکّی یېنگیل موتر تۉقنهشیب کېتگن. حادثه نتیجهسیده ایکّی کیشی هلاک بۉلگن، تۉرت کیشی جراحتلنگن. یرهلنگنلر آرهسیده بیر عیال هم بارلیگی ایتیلهدی.
ترقهتیلگن تصویرلرده موترلردن بیری نینگ ایچیدن میلیونلب افغاني مقداریدهگی نقد پول آلیب چیقیلهیاتگنی کۉرینهدی. اوشبو کتّه مقداردهگی پول نینگ نیمه سببدن اوشبو موتر ایچیده بۉلگنی حاضرچه نامعلوم.
شو بیلن بیرگه، پروان ولایتی امنیه قوماندانلیگینینگ سۉزلاوچیسی فضلالرحمن مسکینیارمذکور ولایت شیخ علی اولسواللیگیده ترافیک حادثهسی صادر بۉلگنینی معلوم قیلدی. اونینگ ایتیشیچه، بو حادثهده بېش کیشی هلاک بۉلگن، اوچ کیشی اېسه یرهلنگن.
مسکینیار بو حادثه دوشنبه کونی (۱۸ جوزا) ساعت۴:۰۰اطرافیده «بیدقول» قیشلاغیده یۉلاوچی تشووچی «فلانکوچ» رسوملی بیر موتر یوک موتری «اکتروز» بیلن تۉقنهشگنی عاقبتیده یوز بېرگنینی بیلدیردی.
اونگه کۉره، بېش کیشی واقعه جاییده جان بېرگن، اوچ کیشی اېسه تن جراحتی آلگن.
حادثه نینگ انیق سببی حلی انیقلنمهگن.
بیراق اکثریت حاللرده بوندهی ترافیک حادثهلریگه تېزلیکنی آشیریش، یۉل حرکتی قاعدهلریگه عمل قیلمسلیک و هیداوچیلرنینگ احتیاطسیزلیگی سبب بۉلیشی ایتیلهدی.
