بوگون اېرتهلب هراتنینگ جبریل شهرچهسی اهالیسی عیاللرنینگ طالبان تامانیدن حبسگه آلینهیاتگنیگه قرشی ناراضیلیک بیلدیریب کۉچهلرگه چیقدی، بیراق طالبان نینگ قتّيق باستیریشیگه دوچ کېلدی.
بوگون (سهشنبه، ۱۹ جوزا) ساعت تخمیناً ۸:۰۰ ده هرات شهری غربیدهگی جبریل شهرچهسی نینگ اۉنلب اهالیسی شهرچه اساسي یۉلی و «بهار زندگی» چارراههسیده تۉپلندی.
اوشبو خلق ییغینی طالبان تامانیدن سۉنگگی اوچ کون دوامیده عیاللرنی حبسگه آلیش حالتلریگه ناراضیلیک صفتیده تشکیل اېتیلدی.
«اطلاعات روز» واقعه جاییدن آلینگن صورت و ویدېولرگه اېگه بۉلگن. اولر طالبان کوچلری اۉق اوزیش، نمایشچیلرنی تیاق و تاش بیلن بېواسطه اوریب-دۉپپاسلش آرقهلی آدملرنی ترقهتیشگه اورینگنینی کۉرسهتهدی.
واقعه گواهلریدن بیری «اطلاعات روز»گه پیام قالدیریب، طالبان کوچلری حتی ناراضیلیک بیلدیرگن یاش ییگیتلرگه پیچاق بیلن هم هجوم قیلگنینی ایتگن.
نمایشچیلر طالبان باسیمیگه قرهمهی دستلبکی ۹۰ دقیقه دوامیده قرشیلیک کۉرستگن وقت ایچیده کمیده اوچ نفر نمایشچی یرهلنیب، شفاخانهگه آلیب کېتیلگن.
«اطلاعات روز»گه یېتیب کېلگن تصویرلر نمایش جایی یقینیده بیر نفر یاش باله نینگ طالبان اۉقلری ساچمه پرچهلری نینگ تېگیشی عاقبتیده یرهلنگنینی کۉرسهتهدی.
