طالبلر رهبری هبتالله آخوندزاده آغزهکی فرمان چیقریب، اوشبو گروه اعضالری همده دولت ادارهلری خادملرینینگ سمارت فونلردن فایدهلنیشینی منبع قیلگن.
اطلاعات روز گزیتهسی قۉلگه کیریتگن حجتگه کۉره، طالباننینگ «فرمانلر و حکملرنی نظارت قیلیش همده کوزهتیب باریش باشقرمهسی» مملکت نینگ سکّیز حربي زونی محکمهلریگه مخصوص کۉرسهتمه یوبارگن. اونده مذکور بویروققه بۉیسونمهگن شخصلر «جنایتچی» دېب حسابلنیشی و حربي محکمهلرگه تاپشیریلیشی بېلگیلنگن.
حجتده قید اېتیلیشیچه، آخوندزاده بو کۉرستمهنی سکّیز زون بۉییچه حربي محکمه رئیسلری، خوفسیزلیک قوماندانلری و استخبارات رهبرلری بیلن اوچرهشوو چاغیده بېرگن.
شونینگدېک، حربي محکمهلر رهبرلریگه اوشبو فرماننی اجرا اېتیش اوچون ضرور چارهلرنی کۉریش همده اونینگ بجریلیشی یوزهسیدن منتظم روشده طالبان رهبری دفتریگه گزارش یوباریش وظیفهسی یوکلهتیلگن.
«فرمانلر و حکملرنی نظارت قیلیش همده کوزهتیب باریش باشقرمهسی» بو مقصدده مخصوص جدول هم جۉنهتگن بۉلیب، اونده عملگه آشیریلگن ایشلر قید اېتیلیب، رهبر ادارهسیگه تقدیم اېتیلیشی کېرهک.
مذکور بویروق اعلان قیلینگنیدن سۉنگ، اجتماعي ترماقلرده طالبلر بیر اعضاسی نینگ اۉز سمارت فونینی سیندیریب تشلهیاتگنی عکس اېتگن ویدېو ترقهلدی.
بوندن تشقری، برمل تومنی امنیه قوماندانی و اونینگ۱۴ نفر خادیمی هم اۉز سمارت فونلرینی یۉق قیلگنی حقیده خبرلر ترقهلگن.
طالبان بوندن اوّل هم اَیریم حدودلرده، جملهدن پنجشیر ولایتیده اۉز اعضالرینینگ سمارت فونلردن فایدهلنیشینی چېکلهگن اېدی.
