افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیراحمد فایق طالبلر تامانیدن عیاللرنینگ «حجابسیزلیک» بهانهسی بیلن حبسگه آلینیشی اسلامي تمایللر، افغانستان خلقینینگ مدنیتی و عرف-عادتلریگه ماس کېلمسلیگینی تأکیدلهدی.
فایق بوگون کېچقورون (یکشنبه، ۱۷-جوزا) هراتده بیر قطار عیاللرنینگ طالبان تامانیدن قۉلگه آلینیشی مناسبتی بیلن بیانات بېریب، شوندهی یازدی: «بو غیرِ انساني، ناقانوني و اسلامگه ضد خطی-حرکتلرنی اېنگ کېسکین سۉزلر بیلن قارهلهیمیز.»
او ینه سوال قۉیگن: «قندهی قیلیب طالبلر محتسبلری اۉزلرینی عیاللر اوچون محرم دېب بیلیب، اولرنی کۉچه و بازارلرده مجبورن حبسگه آلیب کېتماقده؟»
فایق نینگ ایتیشیچه، بو حالت طالبان اعضالری تامانیدن صادر اېتیلگن زۉرآورلیک، تضییق، جنسي تجاوز و مجبوري نکاحلر حقیدهگی ایشانچلی همده حجتلشتیریلگن خبرلر یانیده یوز بېرماقده. اونینگ تأکیدلشیچه، بوندهی حالتلر حاضرگچه شفّاف طرزده تېرگاو قیلینمهگن و جوابگرلیک مسألهسی هم آچیق قالماقده.
افغانستان نینگ بیرلشگن ملتلر تشکیلاتیدهگی نمایندهسی بو چارهلرنی طالبلر نینگ عیاللرنی جمعیتدن سیقیب چیقریش، اولرنینگ اساسي اېرکینلیکلرینی چېکلش و انساني قدر-قیمتینی کمسیتیشگه قرهتیلگن تیزیملی سیاستینینگ بیر قِسمی دېب بهالهگن.
او شوندهی دېگن: «عیاللرنی کيینیش اسلوبی سببلی حبسگه آلیش دین و قدریتلرنی حمایه قیلیش اېمس، بلکه جمعیتده قۉرقوونی یاییش، باسیم اۉتکزیش و آدملرنی قۉرقیتیش واسطهسیدیر.»
طالبلرنینگ هراتدهگی امر به معروف و نهی از منکر ادارهسی یقینده عیاللرنینگ شهرده و اوی تشقریسیده حرکتلنیشیگه عاید ینگی چېکلاولرنی جاري اېتیب، ساچی یاکه یوزی آچیق بۉلگن عیاللر و قیزلرنی حبسگه آلیب، تۉغریدن-تۉغری قماقخانهگه یوباریش حقیده کۉرسهتمه بېرگن اېدی.
مذکور کۉرستمه اجراسی شنبه کونیدن باشلنگن و شو دایرهده بیر قطار عیاللر قۉلگه آلینگنی حقیده خبرلر ترقهلگن.
طالبان بوندن اوّل هم کابل و مملکتنینگ باشقه شهرلریده عیاللر همده قیزلرنی «ناتۉغری حجاب» یاکه «حجابسیزلیک» عیبلاولری بیلن حبسگه آلیب، قماققه تشلهگن.
