طالبلرنینگ امر به معروف و نهي از منکر خادملری هراتنینگ جبرئیل منطقهسیده اوشبو گروه طلب قیلگن کيینیش قاعدهلریگه رعایه قیلمهگنلیکده عیبلب، بیر قطار عیاللر و یاش قیزلرنی حبسگه آلگن.
«اطلاعات روز» گزیتهسی اختیاریگه کېلیب توشگن ویدېو تصویرده آق کییمدهگی طالبان خادملری بیر عیالنی موترگه مجبورن چیقرهیاتگنینی کۉریش ممکن.
حاضرچه حبسگه آلینگن عیاللر و قیزلرنینگ انیق سانی معلوم اېمس.
هراتنینگ جبرئیل منطقهسیدهگی منبعلر «اطلاعات روز»گه طالباننینگ امر به معروف خادملری بو حدودده کۉپلب جایلشتیریلگنینی بیلدیرگن.
منبعلردن بیرینینگ ایتیشیچه، طالبان خادملری «ون» روسومیدهگی موترده کۉچهلر و بازارلرگه هجوم قیلگن.
اونینگ سۉزلریگه کۉره، جبرئیلنینگ «اۉن تۉرت مترلیک» دېب اتهلووچی منطقهسیده عیال دوکان اېگهلریدن بیری هم قۉلگه آلینگن.
طالبلرنینگ هراتدهگی امر به معروف و نهي از منکر ادارهسی یقینده عیاللر کییم-باشیگه قۉییلگن چېکلاولرنی ینه-ده کوچهیتیریب، گروه طلب قیلگن کيینیش قاعدهلریگه عمل قیلمهگن عیاللر حبسگه آلینیشی و «تۉغریدن-تۉغری» قماقخانهگه یوباریلیشینی معلوم قیلگن اېدی.
کېچه کونیدن باشلب هرات نینگ تورلی حدودلریده بیر قطار عیاللر و قیزلر امر به معروف خادملری تامانیدن قۉلگه آلینگنی حقیده خبرلر ترقهلگن.
طالبان آلدین هم کابل و باشقه اَیریم شهرلرده عیاللرنی کيینیش اسلوبی سببلی حبسگه آلگن اېدی.
طالبلر قبول قیلگن کيینیش قاعدهلریگه کۉره، عیاللر برقع یاکه قاره چهدار کيیشی، شونینگدېک، یوزلری کۉرینمسلیگی کېرهک.
