طالباننینگ کابلدهگی امنیه قوماندانلیگی مطبوعات سۉزلاوچیسی خالد زدران، دستلبکی تېرگاو نتیجهلریگه کۉره، فرشته عمادی یعنی بیرلشگن ملتلر تشکیلاتی جمعیت جمغرمهسی خادیمی اۉز جانیگه قصد قیلگنینی معلوم قیلدی.
خالد زدران بوگون (یکشنبه، ۱۷-جوزا) ایکس اجتماعي ترماغیده یازیشیچه، یکوني نتیجهلر طب عدلی و باشقه تېرگاو ایشلری توگللنگچ اعلان قیلینهدی.
او، شونینگدېک، اَیریم عامهوي اخبارات واسطهلریده ترقهلگن باشقه تخمینلر حقیقتگه ماس کېلمسلیگینی تأکیدلهگن.
فرشته عمادینینگ کابلدهگی اۉلیمی حقیده خبرلر ترقهلگنیدن سۉنگ، بیرلشگن ملتلر تشکیلاتینینگ افغانستاندهگی نمایندهلیگی جمعه کونی بیانات بېریب، اونینگ وفات اېتگنینی تصدیقلهگن، بیراق اۉلیم سببیگه ایضاح بېرمهگن.
یوناما عمادینینگ عایله اعضالریگه همدردلیک بیلدیریب، اونینگ عایلهسی شخصي حیاتیگه حرمت بیلن یاندهشیشگه چقیرگن.
بیراق، فرشته عمادینینگ همکسبلریدن بیری بیلن علاقهده بۉلگن منبع «اطلاعات روزگه» اونینگ اېری قاتللیک گمانی بیلن تېرگاو قیلینهیاتگنینی ایتگن. منبع نینگ تأکیدلشیچه، فرشته عایلهوي زۉرآورلیک و نزاعلر عاقبتیده حیاتدن کۉز یومگن.
شونینگدېک، منبع فرشته نینگ روحي یاکه پسیکولوژیگ معمالری بۉلگنی حقیدهگی دعوالرنی اونینگ همکسبلریدن بیری رد اېتهیاتگنینی بیلدیرگن.
حاضرچه بیرلشگن ملتلر تشکیلاتی خادیمینینگ کابلدهگی اۉلیمی قندهی شرایطده یوز بېرگنی و اونینگ انیق سببی رسماً تصدیقلنمهگن. منبعلرگه کۉره، طب عدلی خلاصهلری هم حاضرگچه اعلان قیلینمهگن.
