اروپا بیرلشمهسی پارلمان اعضاسی هانا نیومن، طالبلر هیئاتینینگ بروکسلگه چقیریلیشینی کېسکین تنقید قیلیب، بو اروپانینگ آبروسی و خوفسیزلیگینی خوف آستیگه قۉییشینی ایتدی.
هانا نیومن جمعه کونی (۱۵جوزا) «اوراکتیو» ترماغیگه بېرگن مصاحبهسیده اروپا بیرلشمهسینینگ طالبلر بیلن علاقهلرینی کېسکین تنقید قیلگن.
اونینگ ایتیشیچه، بو علاقهلر «مهاجرت دېپورتلرینی آسانلشتیریش اوچون تخنیکي همکارلیک» بهانهسی بیلن آلیب باریلماقده، شو بیلن بیرگه افغانستانده میلیونلب قیزلر طالبان چېکلاولری سببلی مکتبگه باره آلمهیپتی.
اروپا پارلمانی اوشبو اعضاسی شوندهی دېگن: «مهاجرت کېلیشوولری اوچون تشقی سیاست تمایللرینی قربان قیلهدیگنلر اۉز آبروسینی هم، خوفسیزلیگینی هم یۉقاتهدی.»
اونینگ قۉشیمچه قیلیب ایتیشیچه: «میلیونلب افغانستانلیک قیزلر تعلیمدن محروم بۉلیب تورگن بیر پیتده طالبان وکیللری اروپاگه بېملال کېلماقده، بو ایکّی یوزلمهچیلیک دیر.»
اونینگ فکریچه، بو قرارنینگ عاقبتلری فقط افغانستان بیلن چېکلنمهیدی؛ اگر اروپا باسیم آستیده شونچهلیک آسان یان بېرهدیگن بۉلسه، باشقه اوتاریتر رژیملر هم خلاصه چیقرهدی.
سۉنگگی پیتلرده اروپا بیرلشمهسی طالبلر وکیللرینی بروکسلگه چقیریلیشی کتّه مناظرهلرگه سبب بۉلگن.
اروپا کمیسیونی ایکّی هفته اوّل طالبان هیئاتی «تخنیکي مذاکرهلر» اوچون بروکسلگه باریشینی معلوم قیلگن، بیراق انیق سنه کۉرسهتیلمهگن.
کمیسیون بو مذاکرهلرده هېچ قندهی یوقاری درجهلی دیپلومات قتنهشمسلیگینی، صحبتلر فقط تخنیکي درجهده بۉلیشینی و مقصد مهاجرلرنی دېپورت قیلیش جریانینی آسانلشتیریش اېکنینی بیلدیرگن.
بیراق طالبان هم بو مذاکرهلرگه عیناً شو مقصدده کیریشمسلیگی احتمالی بارلیگی ایتیلماقده. افغانستان دایسپارهسی اېسه اروپادهگی اۉز خوفسیزلیگی بارهسیده جدّي خواطر بیلدیرماقده.
آلمان اېسه طالبان بیلن اېنگ اوّل علاقهگه کیریشگن اروپا دولتلریدن بیری بۉلیب، برلیندهگی افغانستان اېلچیخانهسی و بن قنسوللیگیده طالبان وکیللرینی «تخنیکي خادم» صفتیده قبول قیلگن.
اېندیلیکده اېسه بعضی خبرلرگه کۉره، اوشبو وکیللر نهفقط دیپلوماتیک بنالرنی باشقریب توریبدی، بلکه آلماندن دېپورت قیلینهیاتگن مهاجرلر پروازینی هم تۉسیب قۉیگن.
اندیآر نشریگه کۉره، طالبان تشقی ایشلر وزیرلیگی اوشبو وکیللر آرقهلی آلمان حکومتیگه کۉپراق طالبان دیپلوماتلرینی قبول قیلیش باسیمینی اۉتکزگن، عکس حالده دېپورت قیلینگلرگه کابلگه پرواز اوچون رخصت بېریلمهیدی.
