طالبلرگه قرهشلی عامهوي اخبارات واسطهلری هرات ولایتیده۲۵میلیون افغاني مبلغ عوضیگه قوریلگن مسجد فایدهلنیشگه تاپشیریلگنینی معلوم قیلدی.
باختر خبرگزارلیگی خبریگه کۉره، مسجد هرات ولایتینینگ انجیل اولسواللیگی نوین قیشلاغیده۴مینگ۵۰۰ کوادرات متر میدانده برپا اېتیلگن بۉلیب، بیر وقت نینگ اۉزیده ایکّی مینگ نفر نمازخواننی سیغدیره آلهدی.
نشرنینگ یازیشیچه، مسجد قوریلیشی ایکّی ییل دوام اېتگن.
طالبلر اوشبو لایحه نینگ مالیهلشتیریش منبعی حقیده باتفصیل معلومات بېرمهگن.
سۉنگگی بېش ییل دوامیده طالبلر مسجدلر و دیني مدرسهلر قوریلیشیگه علیحده اعتبار قرهتیب کېلماقده.
ایکّی ییل اوّل طالبان رهبری هبتالله آخوندزاده مملکت قتناو یۉللری بۉیلب اۉنلب مسجدلر قوریش حقیده کۉرسهتمه بېرگن اېدی. بو اېسه افغانستان یۉللری اوزاق ییللیک اوروشلر و تاسیسات رواجلنمهگنلیگی سببلی خوفلی حالتده قالهیاتگن بیر پیتده عملگه آشیریلماقده. هر ییلی یوزلب آدملر ترافیک حادثهلری عاقبتیده هلاک بۉلماقده.
طالبان نینگ مسجدلر قوریلیشیگه اعتبار قرهتیشی افغانستان اهالیسی قشّاقلیک و آزیق-آوقت تنقیصلیگی بیلن کورهشهیاتگن، مملکت اهالیسی نینگ قریب یرمی اېسه خلقارا انسانپرورلیک یاردمگه محتاج بۉلیب قالهیاتگن دورگه تۉغری کېلماقده.
