ایران تشقی ایشلر وزیرلیگینینگ مطبوعات سۉزلاوچیسی اسماعیل بقایی، ایران طالبان و پاکستان اۉرتهسیده اۉت آچیشنی تۉختهتیش کېلیشووینینگ امضالنیشیدن ممنونلیک بیلدیردی.
ایسنا خبریگه کۉره، او دوشنبه کونی ۲۸ میزان) اۉتکزیلگن مطبوعات انجمنیده «طالبان و پاکستان اۉرتهسیدهگی تۉقنهشوولر بیزنی تشویشگه سالگن اېدی. بیز هر ایکّی تاماننی صبر و احتیاطکارلیککه چقیردیک، چونکه منطقهده برقرارلیک جوده مهم» دېدی.
بقايی، «اوشبو کېلیشوو اۉزارا توشونیشگه اساسلنگن ینگی جریاننی باشلب بېرهدی و کېلهجکده بوندهی تۉقنهشوولرنینگ تکرارلنیشینینگ آلدینی آلهدی دېب» اورغولهدی.
بوندن آلدین ایران تشقی ایشلر وزیرلیگینینگ جَنوبي آسیا باشقرمهسی مدیری محمد رضا بهرامي هم بو کېلیشوونی آلقیشلهگن اېدی. او شوندهی دېگن: «افغانستان (طالبان) و پاکستان اۉرتهسیده اۉت آچیشنی تۉختهتیش همده نزاعلرنی سیاسي یۉل بیلن حل اېتیش بۉییچه کېلیشوو فایدهلی و اعتبارگه لایق قدم دیر»
بهرامينینگ قۉشیمچه قیلیشیچه، «منطقهدهگی برچه دولتلرنینگ عمومي منفعتی – تینچلیک، برقرارلیک و خوفسیزلیکنی مستحکملش دیر.»
طالبان و پاکستان بیر هفتهلیک کېسکینلیک و تۉقنهشوولردن سۉنگ کېچه اېرتهلب قطر و تورکيه واسطهچیلیگیده اۉت آچیشنی تۉختهتیش کېلیشوویگه امضا چېکدیلر.
کېلیشووگه کۉره، ایکّی تامان بیر- بیرینینگ حدودي دخلسیزلیگینی حرمت قیلیش و چېگره منطقهلریده تینچلیک همده برقرارلیکنی مستحکملاوچی میکانیزملرنی یرهتیشگه وعده بېرگن.
