طالبلر رهبری هبتالله آخوندزاده مملکت نینگ شِمال-شرقي و شِمال-غربي ولایتلریدهگی والیلر، علمالر کېنگشی رئیسلری و استیناف محکمهلر مسووللری بیلن اوچرهشووده افغانستانده خوفسیزلیک، تینچلیک و قصاص آلیش نینگ آلدینی آلیش مقصدیده «عمومي عفو» اعلان قیلینگنینی ایتدی.
بوگون پنجشنبه (۱۴جوزا) قندهارده بۉلیب اۉتگن اوشبو اوچرهشووده او طالبلر جنگچیلریگه قصاص آلیشنی تعقیقلهگنینی و بوندهی حرکتلردن قَیترگنینی تأکیدلهدی.
آخوندزاده سابق حربيلر اۉلدیریلهیاتگنی حقیدهگی خبرلرگه هم تۉختهلیب، شوندهی دېگن: «بیز اولرگه قوراللرینگیزنی تشلنگلر، سیزلرنی اۉلدیرمهیمیز و حساب-کتاب قیلمهیمیز، دېدیک. اولر قوراللرینی تشلشدی، بیز اېسه اولرنی عفو اېتدیک. شوندن کېین هم اولردن حساب سۉرمهدیک و حاضر هم بوندهی قیلمهیمیز.»
اونینگ سۉزلریگه کۉره، 20 ییللیک اوروشدن کېین کتّه عفو عملگه آشیریلگن اېکن، آدملر هم بیر-بیرینی کېچیریشگه اوندهلیشی کېرهک، چونکه جمعیتده اۉتمیشدن قالگن عداوت و کېلیشماوچیلیکلر هنوز موجود.
طالبلر رهبری محلي مسووللرگه اهالینی اۉزارا یرهشیشگه، دشمنلیک و عداوتلردن واز کېچیشگه اوندهشنی توصیه قیلیب، بو نزاعلر کېینگی اولادلرگه اۉتمسلیگی لازملیگینی ایتدی.
بیراق طالبان حاکمیتنی قَیته اېگهلهگنیدن سۉنگ سابق عملدارلر و خوفسیزلیک کوچلری خادملریگه نسبتاً محکمهسیز قتل، اۉزباشیمچهلیک بیلن حبسگه آلیش و قییناقلر حقیدهگی کۉپلب خبرلر نشر قیلینگن.
افغانستانده بیرلشگن ملتلر تشکیلاتینینگ یاردم ادارهسی (یوناما) نینگ انسان حقوقلری بۉییچه سۉنگگی گزارشیگه کۉره، جاري ییل نینگ ۱-جنورییدن ۳۱- مارچگچه کمیده بېش نفر سابق حربينینگ اۉلدیریلیشی، ۲۳ ته اۉزباشیمچهلیک بیلن حبسگه آلیش یاکه قماققه آلیش حالتی همده تۉقّیزته قییناق و یامان معامله حالتی قید اېتیلگن.
