ایتالیا عامهوي اخبارات واسطهلرینینگ خبر بېریشیچه، مملکت پولیسی اوچ نفر افغانستانلیک و بیر نفر پاکستانلیکدن عبارت تۉرت مهاجر ایشچینینگ اۉلدیریلیشی عیبی بیلن ایکّی پاکستانلیکنی حبسگه آلگن.
قربانلرنینگ جسدلری سهشنبه کونی( ۱۲ جوزا) ایتالیانینگ جَنوبیدهگی کالابریا منطقهسیدهگی قیشلاق خۉجهلیگی حدودیده جایلشگن بیر تانک تیل یقینیده یانیب کېتگن موتر ایچیدن تاپیلگن. ینه بیر افغانستانلیک موتر آینهسینی سیندیریب قاچیشگه موفق بۉلگن.
ایتالیا یېتکرمهلری معلوماتیگه کۉره، کوزهتوو کامرهلریدهگی تصویرلرده ایکّی کیشی موتر اېشیکلرینی تشقریدن قفللب، سۉنگ اونگه یانووچی سویوقلیک سېپیب اۉت قۉیگنی عکس اېتگن.
یانغین اۉچیرووچیلر محلي وقت بیلن ساعت ۱۳:۰۰ اطرافیده واقعه جاییگه چقیریلگن و یانغین برطرف اېتیلگچ، تۉرتته کویگن جسدنی تاپگن.
خبرلرگه کۉره، ایکّی پاکستانلیک گماندار هم عیناً ویدېوکوزهتوو تصویرلری اساسیده قۉلگه آلینگن.
حادثهدن امان قالگن شخصنینگ ایتیشیچه، ماجرا گماندارلر موتردهگی یۉلاوچیلردن ترانسپورت پولی طلب قیلگنی و اولر بونی تۉلهشدن باش تارتگنی آرتیدن یوزهگه کېلگن.
او شونینگدېک، اوشبو حدوددهگی قولوپنای پلانتسیهلریده ایشلهگن مهاجر ایشچیلرگه ایش حقی بېریلمهگنینی، بیراق اولرگه آزیق-طعام و یشش جایی تقدیم اېتیلگنینی دعوا قیلگن.
معلوماتلرگه کۉره، سۉنگگی آیلرده کالابریا منطقهسیده پاکستانلیک مهاجرلرنی تشياتگن موترلرگه اۉت قۉییش بیلن باغلیق 14 ته حالت قید اېتیلگن.
بو حدودده قیشلاق خۉجهلیگی ایش اۉرینلری و یشش جایلرینی تقسیملش مسألهسیده مهاجرلر اۉرتهسیده نزاعلر هم کوزهتیلگن.
قاتللیکلر ایتالیا جماعتچیلیگینی لرزهگه سالیب، کېنگ ناراضیلیک و مناسبتلرگه سبب بۉلگن.
کالابریا منطقهسی باشلیغی روبرتو اوچیوتو، اوشبو واقعهنی «غیرِ انساني» دېب اتهب، بو خبر «انسانیتگه بۉلگن ایشانچنی لرزهگه کېلتیرهدی» دېگن.
شونینگدېک، ایتالیا عمومی ایش کنفدراسیونی اوشبو حادثهگه مناسبت بیلدیریب، مملکتنینگ قیشلاق حدودلریده محنت قیلهیاتگن ایشچیلر، جملهدن مهاجر ایشچیلرنینگ کوندهلیک معمالریگه قرشی کورهشیشنی طلب قیلگن.
