نورستاندهگی منبعلرنینگ معلوم قیلیشیچه، قربان هییتی کونلریده اۉلدیریلگن دهقان نینگ قاتلی طالبان صفیدهگی شخص دیر.
۳۳ یاشلی دهقان زینالاسلام شنبه کونی کېچقورون نورستان ولایتی مرکزی پارون نینگ «ایشتیوي» قیشلاغیده اۉز اویی یقینیدهگی میسهزارنی سوغارهیاتگن پیتده اۉققه توتیب اۉلدیریلگن.
طالبان نینگ نورستاندهگی محلي مسووللری اوّلراق دهقان سیاحلرنینگ هواگه اۉق اوزیشی عاقبتیده هلاک بۉلگنینی معلوم قیلگن اېدی. بیراق بیر منبع مقتول نینگ قرینداشلریدن بیری محلي عامهوي اخبارات واسطهلریگه اونینگ «قصداً و بېواسطه نشانگه آلینیب اۉلدیریلگنی»نی ایتگن.
منبعلرگه کۉره، گماندار نینگ اسمی محمود بۉلیب، او قندهارلیک و طالبان اعضاسی حسابلنهدی.
طالبلرنینگ محلي عملدارلری ایلگری محمودنی قندهارلیک تدبیرکار دېب تنیشتیرگن اېدی. اما منبعلر نینگ ایتیشیچه، او طالبان ایچکی ایشلر وزیرلیگی نینگ مخصوص بۉلینمهلریدن بیریده خدمت قیلهدی همده اوشبو گروه نینگ عالي تعلیم وزیری ندا محمد ندیم نینگ قرینداشی دیر.
منبعلرنینگ بیلدیریشیچه، گماندار محلي اهالی تامانیدن قۉلگه آلینیب، طالبان وکیللریگه تاپشیریلگن. شونینگدېک، اونینگ یانیدن طالبان اعضالیگی گواهنامهسی و قورال آلیب یوریش حجتی تاپیلگن.
اۉلدیریلگن شخصنینگ عایله اعضالری اوشبو شخصنینگ آچیق محکمه قیلینیشی و عدالت تأمینلنیشینی طلب قیلماقده.
نورستان اهالیسیدن بیری اوچ کون اوّل محلي طالبان مسووللری قوراللنگن سیاحلرنینگ ولایتگه کیریشینی تعقیقلهگنینی، اما بو تعقیقگه قرهمهی، گماندار قورال بیلن حدودگه کیرگنینی ایتگن.
اونینگ سۉزلریگه کۉره، قوراللنگن سیاحلرنینگ اکثریتی طالبان اعضالری یاکه اولرنینگ قرینداشلری دیر.
نورستان اهالیسی ولایتگه قوراللنگن سیاحلر کیریشینی بوتونلهی تعقیقلشنی طلب قیلماقده.
