اقتصادي نشریه «بزنس ریکاردر» نینگ یازیشیچه، پاکستاننینگ افغانستان بیلن کېسکینلشگن مناسبتلری همده یقین شرقدهگی بحرانلر مملکت اقتصادیگه «ایکّی کتّه ضربه» بۉلگن و سۉنگگی یېتّی آی ایچیده۱.۴میلیارد دالر ضرر یېتکزگن.
نشر بوگون (چهارشنبه،۱۳ جوزا) پاکستان تجارت وزیرلیگی گزارشیگه تهیهنیب خبر بېریشیچه، ۲۰۲۵-ییل ۱۱-اکتوبردن ۲۰۲۶ییل ۱۸-میگچه بۉلگن دورده افغانستان بیلن چېگره اۉتیش پونکتلری نینگ یاپیلیشی سببلی پاکستان ۸۵۰ میلیون دالر ضرر کۉرگن.
گزارشگه کۉره، پاکستان ترانسپورت کمپنیلری هر ییلی افغانستاندن و یۉلاوچی موترلر ترانزیتیدن اۉرتهچه۲۰۰ میلیون دالر درآمد آلهدی، اما چېگره یاپیلگچ بو درآمد تۉختهب قالگن. عینِ پیتده افغانستان یوک تشوولرینی اېران یۉلکلری آرقهلی عملگه آشیریشگه حرکت قیلماقده.
شونینگدېک، امریکا و اسرایل نینگ ایران بیلن باغلیق حربي-سیاسي کېسکینلیگی بوتون یقین شرقنی قمرب آلیب، پاکستاننینگ فارس کۉرفزی مملکتلریگه اېکسپورتیگه۶۰۰ میلیون دالر ضرر یېتکزگن.
«بزنس ریکاردر» نینگ تأکیدلشیچه، بو جریان نهفقط منطقهنی، بلکه گوبل اقتصادنی هم باسیم آستیگه آلگن.
پاکستان نینگ عمومي تجارت حجمی سۉنگگی تۉقّیز آیده۲۸ میلیارد دالرگه یېتگن بۉلسه-ده، بو اۉتگن ییل نینگ شو دوریگه نسبتاً ۲۳ فایزگه کمهیگن.
افغانستان و پاکستان اۉرتهسیدهگی کېسکینلیکلر اساسن تحریک-طالبان پاکستان (تیتیپی) مسألهسی یوزهسیدن کېلیب چیققن. اوّلیگه بو چېگره ماجراسی بۉلگن بۉلسه، کېینچهلیک ایکّی تامان اۉرتهسیدهگی کېنگراق حربي تۉقنهشوولرگه ایلنگن.
چېگره پونکتلری تورخم، سپین بولدک و بهرامچه یاپیلگنی سببلی سودا تۉختهگن، پاکستان اېسه افغانستان شهرلری بۉیلب ضربهلر بېرگن، افغانستان تامانی اېسه چېگره پُوستهلریگه هجوملر اویوشتیریب جواب قَیترگن.
نتیجهده ایکّی دولت اۉرتهسیدهگی سودا کېسکین قیسقرگن: ۲۰۲۴-ییلده۲.۴۶۱میلیارد دالر بۉلگن عمومي سودا ۲۰۲۵-ییلده ۱.۷۶۶ میلیارد دالرگه توشگن.
افغانستان تجارت وزیرلیگی معلوماتیگه کۉره، ۲۰۲۴-ییلده افغانستان نینگ پاکستانگه اېکسپورتی ۸۱۷ میلیون دالر بۉلگن بۉلسه، ۲۰۲۵-ییلده بو کۉرستکیچ ۵۰۵میلیون دالرگه کمهیگن. ایمپورت اېسه ۱.۶۴۴ میلیارد دالردن ۱.۲۶۱میلیارد دالرگه توشگن.
چېگرهلر نینگ تۉلیق یاپیلیشی بیلن سۉنگگی آیلرده ایکّی دولت اۉرتهسیدهگی تجارت دېیرلی تۉختهب قالگن.
