پاکستاننینگ افغانستان بۉییچه مخصوص وکیلی محمد صادقنینگ معلوم قیلیشیچه، او و چینلیک همکسبی افغانستان توپراغیدن کېلهیاتگن ترورچیلیک تهدیدلریگه قرشی کورهشده ایکّی مملکت حرکتلرینی موافقلشتیریشگه کېلیشیب آلگن.
محمد صادق ایکس اجتماعي ترماغیده یازیشیچه، او دوشنبه کونی (۱۱-جوزا) اسلام آبادده چیننینگ افغانستان بۉییچه مخصوص وکیلی یو شیائو یونگ بیلن اوچرهشیب، ملاقات اۉتکزگن.
محمد صادق شوندهی دېدی: «بیز منطقوي خوفسیزلیک مسألهلری، جملهدن، افغانستان توپراغیدن فعالیت یوریتهیاتگن پاکستان طالبانی حرکتی (تیتیپی) و شرقي تورکستان اسلامي حرکتی تهدیدلری حقیده ثمرهلی مذاکرهلر آلیب باردیک.»
اونینگ قۉشیمچه قیلیشیچه، ایکّی تامان تروریزمگه قرشی کورهشدهگی سعی-حرکتلرینی موافقلشتیریشی ضرور. «بیز منطقوي تینچلیک و برقرارلیکنی حمایه قیلیش مقصدیده تروریزمگه قرشی کورهش بۉییچه همکارلیک و موافقلشتیریشنی کوچهیتیریشگه کېلیشیب آلدیک»، دېدی او.
«افغانستان توپراغیدن کېلهیاتگن تروریزم»گه قرشی همکارلیک پاکستان باش وزیری شهباز شریف و چین جمهور رییسی شی جینپینگ اۉرتهسیدهگی کېلیشوولرنینگ هم بیر قِسمی بۉلگن.
پاکستان تشقی ایشلر وزیرلیگی بیر هفته اوّل، شریف نینگ پکینگه تشریفی بیلن بیر وقتده، ایکّی تامان «هېچ بیر شخص، گروه یاکه تشکیلاتگه، جملهدن تیتیپی، شرقي تورکستان اسلامي حرکتی و باشقهلرگه افغانستان توپراغیدن فایدهلنیب منطقوي خوفسیزلیک و منفعتلرگه ضرر یېتکزیش یاکه ترورچیلیک فعالیتینی عملگه آشیریش امکانینی بېرمسلیک ضرورلیگی»نی تأکیدلهگنینی بیلدیرگن.
پاکستان تیتیپی نینگ افغانستانده یشیرین مسکنلری و اۉقوو مرکزلری موجودلیگینی دعوا قیلهیاتگن بۉلسه، چین هم شرقي تورکستان اسلامي حرکتی اعضالری افغانستاننینگ شِمالی-شرقیدن سینکیانگ حدودیگه کیریب کېلهیاتگنینی ادعا قیلماقده.
بیراق طالبان دایما افغانستان توپراغیده خارجي قوراللی گروهلر موجودلیگی و اولر بیلن همکارلیک قیلهیاتگنی حقیدهگی دعوالرنی رد اېتیب کېلهدی.
