سمنگان ولایتیدهگی محلي منبعلرنینگ معلوم قیلیشیچه، اوشبو ولایت مرکزیده بیر اېرکک شام نمازینی ادا اېتهیاتگن پیتده نامعلوم قوراللی شخصلر تامانیدن اۉلدیریلگن.
محلي منبع نینگ ایتیشیچه، اۉلدیریلگن کیشینینگ اسمی حاجی نبی بۉلیب، او کېچه تونده (۱۱جوزا، دوشنبه) آیبیک شهریدهگی کندل جامع مسجدی قورال بیلن آتیب کېتیلگن.
منبعگه کۉره، حاجی نبی شام نمازینی ادا اېتهیاتگن پیتده نامعلوم قوراللی شخصلر هجومیگه اوچرهگن و سمنگان ولایت شفاخانهسیگه آلیب باریلگنیدن سۉنگ وفات اېتگن.
سمنگان ولایتیدهگی طالبان امنیه قوماندانلیگی مطبوعات سۉزلاوچیسی حشمتالله رحماني اوشبو حادثهنی تصدیقلهگن.
اونینگ ایتیشیچه، قاتللیکنی صادر اېتگن شخصلرنی انیقلش بۉییچه تېرگاو باشلنگن، بیراق حادثه نینگ سببلری حاضرچه معلوم اېمس.
منبعلر معلوماتیگه کۉره، حاجی نبی قبیله آقسقاللریدن بیری بۉلیب، دوکاندارلیک بیلن شغللنگن.
سۉنگّی پیتلرده افغانستان بۉیلب سِرلی قاتللیکلر کۉپهیگن. بوندهی حادثهلر عادتده «نامعلوم قوراللی شخصلر» تامانیدن صادر اېتیلگنی ایتیلهدی.
کم حاللرده طالبان قاتللیکلرنی صادر اېتگن شخصلر انیقلنگنی یاکه جنایت سببلری معلوم بۉلگنی حقیده خبر بېرهدی.
اکثریت حاللرده اېسه سِرلی قاتللیکلرنینگ عیبدارلری نامعلوملیگیچه قالماقده و فقرالر طالباننینگ بو بارهدهگی ستکهشلیگیدن شکایت قیلماقده.
