«هزاره مدنیت کونی» فستیوالی ایلک بار بیر دولت رهبری اشتراکیده فنلند نینگ یاروینپه شهریده بۉلیب اۉتدی.
فستیوال یکشنبه کونی (۱۰-جوزا) فنلنددهگی هزارهلر مدنیت اویی مېزبانلیگیده و اوشبو مملکت نینگ دولت عملدارلری اشتراکیده تشکیل اېتیلدی.
فنلند باش وزیری پتری اورپو اۉز نطقیده هزاره جمعیتی نینگ اَیریم مدني قدریتلری و اولرنینگ فنلند خلقی همده دولت سیاستی قدریتلری بیلن مشترک جهتلریگه تۉختهلدی.
او شوندهی دېدی: «هزاره جمعیتی هر دایم تعلیمگه کتّه اهمیت بېرگن. بیز بیلهمیزکی، هزارهلر افغانستانده قیزلرنینگ تعلیم آلیش حقوقی اوچون کورهشگن دستلبکی گروهلردن بیری بۉلگن. بو جوده مضمونلی و قدرلی مسأله، چونکه تعلیم و تېنگلیک فنلند اوچون هم نهایتده مهم قدریتلردن دیر.»
فنلند باش وزیری هزارهلرگه مراجعت قیلیب دېدی: «مېن سیز نینگ جمعیتینگیزده اولکن صلاحیت و امکانیتلر موجودلیگیگه ایشانهمن. سیز فنلندده خوش کېلیبسیز و عمومي کېلهجگیمیزنی قوریشده مهم رۉل اۉینهیسیز. بو نینگ اوچون سیزلرگه منّتدارچیلیک بیلدیرهمن.»
او فستیوال اۉتکزیلگنینی آلقیشلب، شوندهی قۉشیمچه قیلدی: «بوگونگی دستور تیل، لهجه، مذهب، موسیقی، ادبیات، کییم-کېچک و صنعت نینگ برچهسی شخصیتنی شکللنتیرووچی عامللر اېکنینی کۉرسهتماقده. بولر هر بیریمیزنی کیم اېکنیمیزنی بېلگیلهیدیگن عنصرلردیر. اینیقسه، انسان اۉز ایلدیزلری، قرینداشلری و آنه یورتیدن اوزاقده یشه یاتگنیده بو قدریتلرنینگ اهمیتی ینه-ده آرتهدی.»
فنلنددهگی هزارهلر مدنیت اویی رهبری لطیف فیاض هزارهلر بوگونگی کونگه یېتیب کېلیش اوچون مرکّب و قیغولی تاریخي یۉلنی باسیب اۉتگنینی ایتدی.
اونینگ تأکیدلشیچه، «هزارهلر افغانستانده تاریخ دوامیده کمسیتیش، ظلم و قیرغینلرگه دوچ کېلگن.»
او فنلند دولتی و خلقیگه هزارهلرنی آچیق بغری بیلن قبول قیلگنی اوچون منّتدارچیلیک بیلدیردی.
فیاض شوندهی دېدی: «بوگون هزارهلر فنلندنی اۉز اویی دېب بیلهدی و تورلی مدنیتلر بیلن تینچ-تاتوو یشش هزاره مدنیتی نینگ مهم خصوصیتلریدن بیری دیر.»
یاروینپه شهری حاکمی نینگ اۉرینباسرلری پیرجو و جنی هزارهلر فنلند نینگ کۉپ مدنیتلی جمعیتی نینگ فعال قِسمی اېکنینی تأکیدلهدیلر.
اولرنینگ قۉشمه بیاناتیده فنلنددهگی هزارهلر اجتماعي مسألهلرده فعال اشتراک اېتیشینی همده اولرنینگ تشکیلاتلری اۉز جماعهسی اعضالرینی محلي سیلاولر و آواز بېریشده قتنهشیشگه رغبتلنتیریشینی قید اېتدیلر.
تدبیر دوامیده هزارهلرنینگ تاریخی، صنعتی و موسیقهسی هم نمایش اېتیلدی.
باميان بوداسی تصویری توشیریلگن، نثرالله پیک تامانیدن یرهتیلگن اثر فنلند باش وزیریگه ساوغه قیلیندی.
شیدا و لینا اسملی کیچیک قیزلر هزارهلرنینگ عنعنوي لباسلریده شعر اۉقیب بېردیلر.
الهه سرور جانلی موسیقی اجرا اېتیب، علیحده شُکوه و هیجان محیطینی یرهتدی همده مهمانلر و اشتراکچیلر نینگ آلقیشیگه سزاوار بۉلدی.
حفیظ حبیبي و شاهین سحر هزارهلرنینگ فولکلور قۉشیقلرینی اجرا اېتدیلر.
دستور نینگ بیر قِسمیده یاش قیزلر و ییگیتلر عنعنوي هزاره کییملریده صحنهگه چیقیب، نهفقط ملي لباسلرنی، بلکه هزاره عیاللری نینگ قۉل محنتی و مهارتینی هم نمایش اېتدیلر. اولر ایگنه و ایپ یاردمیده متاعلرده قندهی نفیس و چیرایلی کییملر یرهتیشینی کۉرسهتدیلر.
فستیوال بیلن بیر وقتده عنعنوي طعاملر، رسملر و محلي هزاره کییملری کۉرگزمهسی هم تشکیل اېتیلدی و اشتراکچیلر تامانیدن کتّه قیزیقیش بیلن کوتیب آلیندی.
«هزاره مدنیت کونی» دنیا هزارهلری مدنیتینی اولوغلشگه بغایشلنگن سنه بۉلیب، ۲۰۱۷-ییلدن بویان هر ییلی۱۹-می کونی نشانلنهدی.
بیراق بوگونگی کونده بو سنه کېنگ قمراولی بیرهمگه ایلنگن بۉلیب، می آیی نینگ باشیدن آخریگچه آسیا، اروپا، امریکا و آسترليا نینگ تورلی شهرلریده نشانلنهدی.
حاضرگچه پاکستان، امریکا، کانادا، بویوک بریتانیا، آسترليا و باشقه مملکتلردهگی بیر قطار دولت مؤسسهلری، محلي کېنگشلر همده صنعت تشکیلاتلری هزاره مدنیت کونینی رسماً تن آلگن.
هزاره مدنیت کونی نشانلنهیاتگن اۉن ییلگه یقین دور ایچیده ایلک بار فنلنددهگی هزارهلر اۉز حکومتلری رهبرینی اوشبو فستیوالگه جلب قیلیشگه موفق بۉلدیلر.
فنلند باش وزیری پتری اورپو هزاره مدنیت کونی فستیوالیده اشتراک اېتگن ایلک دولت رهبری بۉلدی.
