نارویده یشاوچی بیر گروه افغانستانلیک عیال نمایشچیلر، مدنی فعاللر و انسان حقوقلری حمایهچیلری ناراضیلیک ییغیلیشی اۉتکزیب، طالبان نینگ «اېر-خاتینلرنی اجرهتیش نظامی»ده بالهلر نکاحینی تن آلیشینی قارهلهدیلر و بونی بالهلر حقلرینینگ آچیقدن-آچیق بوزیلیشی دېب بهالهدیلر.
بوگون (یکشنبه،۱۰ جوزا) اۉتکزیلگن اوشبو ییغیلیشده اشتراکچیلر طالبان تامانیدن بالهلر نکاحینینگ تن آلینیشی افغانستانده قیز بالهلرگه نسبتاً سوءاستعماللرنینگ کۉپهییشیگه زمین یرهتیشینی و مینگلب قیزلرنینگ کېلهجگینی خوف آستیگه قۉییشینی تأکیدلهدیلر.
نمایش اشتراکچیلری ناروی حکومتی و خلق ارا همجمعیتنی افغانستاندهگی «انسان حقوقلرینینگ کېنگ کۉلملی بوزیلیشی»گه نسبتاً سکوت سقلهمسلیککه همده طالبانگه باسیمنی کوچهیتیریش اوچون برچه دیپلوماتیک و حقوقي واسطهلردن فایدهلنیشگه چقیردیلر.
نمایشچیلرنینگ فکریچه، قیزلرنی تعلیمدن محروم قیلیش و اولرنی بالهلیک چاغیدهیاق مجبوري نکاحگه یۉنهلتیریش تیزیملی کمسیتیش همده انسان نینگ اساسي حقوقلرینی بوزیشنینگ یقّال کۉرینیشی دیر.
اولر خلقارا همجعیت و خلق ارا تشکیلاتلردن طالبان نینگ افغانستان عیاللریگه قرشی سیاستینی «جنسیتی آپارتاید» صفتیده تن آلیشنی و اوشبو سیاست قربانلرینی ضرور درجهده قۉللب-قوّتلشنی سۉردیلر.
«اېر-خاتینلرنی اجرهتیش نظامی» طالبان رهبری هبتالله آخوندزاده تامانیدن تصدیقلنگن و امضالنگن بۉلیب، یقینده طالبان نینگ عدلیه وزیرلیگی تامانیدن نشر قیلینگن.
مذکور نظامده بالهلر نکاحی بالواسطه تن آلینگن همده اجرهلیش حقوقی مسألهسیده عیاللر و اېرککلر اۉرتهسیده فرق قۉییلگن.
طالبان اوشبو نظامده نکاح اوچون اېنگ کم یاشنی بېلگیلهمهگن. بیراق بالهلر نکاحینی قندهی بېکار قیلیش ممکنلیگی یاکه مجبوري نکاحگه مجبور قیلینگن باله نینگ بلاغت یاشیگه یېتگچ نکاحنی بېکار قیلیشنی قندهی طلب قیلیشی ممکنلیگی حقیده ایضاح بېرگن. اوشبو نظام نینگ اعلان قیلینیشی کېنگ کۉلمدهگی تنقید و ناراضیلیکلرگه سبب بۉلگن. اما طالبان حجت اسلامي کۉرستمهلر و شریعت اساسیده تیارلنگنینی بیلدیرگن همده تنقیدلرگه اهمیت بېرمسلیگینی تأکیدلهگن.
