پاکستان خوفسیزلیک رسميلری خیبر پختونخوا ایالتی نینگ آدمخیل واديسیده آلیب باریلگن تازهلش عملیاتی دوامیده سۉنگّی ایکّی کون ایچیده تحریک طالبان پاکستان (تیتیپی) نینگ۱۳ نفر اعضاسی، جملهدن ایکّی نفر افغانستان فقراسی اۉلدیریلگنینی معلوم قیلدی.
پاکستاننینگ «دان» گزېتهسی خوفسیزلیک منبعلریگه تهیهنیب خبر بېریشیچه، شنبه کونی ایکّی نفر افغانستان وطنداشی و آلتی نفر تیتیپی اعضاسی، جمعه کونی اېسه اوشبو گروه نینگ ینه بېش نفر اعضاسی یۉق قیلینگن.
خبرده ایتیلیشیچه، هلاک بۉلگن افغانستانلیکلر «قاری زینتالله» و «لونگین» بۉلیب، اولر تیتیپیگه علاقهدار «طارق گیدار» گروهی اعضالری بۉلگن.
پاکستان اوردوسی و پولیسی جمعه کونی (۸ جوزا) پېشاور یقینیدهگی آدم خیل واديسیده تیتیپی جنگریلری نینگ موضعلریگه قرشی «تازهلش عملیاتی»نی باشلهگن.
خوفسیزلیک رسميلریگه کۉره، عملیات هنوز دوام اېتماقده و حدود قورشهب آلینگن.
اسلام آباد نینگ دعوا قیلیشیچه، ۲۰۲۱-ییلده افغانستان طالبانی حاکمیتگه قَیتگنیدن سۉنگ پاکستانده ترورچیلیک فعالیتی ینه کوچهیگن.
پاکستان رسميلری افغانستان طالبانی تیتیپی اعضالری و یېتکچیلریگه اۉقوو مرکزلری همده یشیرین باشپناهلر یرهتیب بېرهیاتگنینی، شونینگدېک افغانستان فقرالریگه هم اوشبو گروه صفیده پاکستان دولتیگه قرشی جنگ قیلیش امکانینی بېرهیاتگنینی اَیتماقده.
بیراق افغانستان طالبانی بو عیبلاولرنی دایما رد اېتیب کېلهدی.
طالبان رسمي روشده تیتیپی نینگ پاکستان حکومتی بیلن اوروشیگه علاقهدار اېمسلیگینی کۉرسهتیشگه حرکت قیلگن و اۉتگن ییلی کابلده ییریک دیني علمالر ییغیلیشینی اۉتکزیب، افغانستاندن تشقریده «جهاد» قیلیش «فرض اېمس»لیگی حقیده فتوا چیقرگن اېدی.
شونگه قرهمهی، طالباننی قۉللب-قوّتلاوچی اَیریم عملدارلر و دیني ترغیباتچیلر پاکستان حدودیدهگی اوروشنی همان جایز دېب حسابلب کېلماقده.
