طالبلرنینگ نورستان ولایتی امنیه قوماندانلیگی نینگ معلوم قیلیشیچه، اوشبو ولایت مرکزیده بیر موترنینگ دریاگه قولهب توشیشی عاقبتیده تۉرت کیشی هلاک بۉلگن، ینه بیر کیشی یرهلنگن.
خبرلرگه کۉره، حادثه تیناوون تونده (جمعه، ۸-جوزا) پارون شهری یقینیدهگی پسته جنگل منطقهسیده یوز بېرگن.
طالبلر نظارتیدهگی باختر اخبارات آژانسینینگ یازیشیچه، «تودی» روسومیدهگی موتر یۉلدن چیقیب کېتیب، دریاگه قولهگن.
محلي طالبلر مسووللری موتر یۉلاوچیلری فراه ولایتی اهالیسی بۉلیب، دَم آلیش اوچون نورستانگه بارگنینی بیلدیرگن.
معلوماتلرگه کۉره، هلاک بۉلگنلرنینگ جسدلری حاضرگچه تاپیلمهگن و دریاده قیدیروو ایشلری دوام اېتماقده.
تیناوون کېچقورون لغمان ولایتیده هم قَیتیب کېلووچیلرنی آلیب کېتهیاتگن موتر اغدریلیب کېتیشی عاقبتیده 18 کیشی هلاک بۉلگن اېدی. طالبان نینگ محلي مسووللری اوشبو حادثهده هلاک بۉلگنلرنینگ اکثریتی عیاللر و بالهلر اېکنینی معلوم قیلگن.
افغانستانده ترافیک حادثهلری هر ییلی یوزلب انسانلرنینگ حیاتیگه ضامن بۉلیب، ینه یوزلب کیشیلرنینگ جراحتلنیشیگه سبب بۉلماقده.
متخصصلر بوندهی حادثهلر نینگ اساسي سببلری صفتیده هیداوچیلر نینگ احتیاطسیزلیگی، یۉل بېلگیلری نینگ یېتیشمسلیگی و یۉللر نینگ یامان احوالینی کۉرستماقده.
