پرتغال پارلمانی جماعت جایلریده «جنسیتی یاکه دیني سببلرگه کۉره» بورقه و نقاب تقیشنی منع قیلووچی قانون لایحهسینی معقولهدی.
مذکور لایحهگه کۉره، جماعت جایلریده بورقه یاکه نقاب کيگن شخصلرتۉرت مینگ یورو گچه جریمهگه تارتیلهدی.
بو تشبث اۉته اۉنگچی «چگا» حزبی تامانیدن ایلگری سوریلگن بۉلیب، او مرکزچی و اۉنگ یۉنهلیشدهگی حزبلر تامانیدن هم قۉللب-قوّتلنگن.
لایحهنینگ قانوني کوچگه کیریشی اوچون پرتغال جمهور رییسی مارسلو ربلو د سوزا تامانیدن امضالنیشی کېرهک.
جمهور رییس اوشبو لایحهنی امضالش، رد اېتیش یاکه اساسی قانون محکمهسیگه قَیته کۉریب چیقیش اوچون یوباریش و صلاحیتیگه اېگه.
اگر قانون تصدیقلنسه، پرتغال اروپا اتفاقیدهگی فرانسه و اترش کبی مملکتلر قطاریگه قۉشیلهدی، بو دولتلرده عیاللرنینگ باش یاکه یوزلرینی تۉلیق بېرکیتیشیگه قسماً یاکه تۉلیق منع جاري اېتیلگن.
دیلی میل نشرینینگ خبریگه کۉره، پرتغالده بوندهی کییم کيهدیگن عیاللر سانی کۉپ اېمس، بیراق «اسلامي حجاب» مسألهسی جمعیتده کېسکین بحث و مناظرهلرگه سبب بۉلگن.
پرتغالنینگ چپ قنات حزبلری بو قانون لایحهسیگه قرشی چیقیب، اونگه قرشی آواز بېرگن. اولر بو تشبث «چېت اېلّیکلر و تورلی اعتقاددهگی انسانلرنی نشانگه آلیش» مقصدیده ایشلهتیلماقده، دېب تأکیدلهگن.
بیراق «چگا» حزبی، قانون لایحهسیده عیاللر و عموماً انسانلرنینگ یوزینی یشیریش اولرنی «جمعیتدن چېتلهتیلیش و کمسیتیلیش» حالتیگه سالهدی همده «اېرکینلیک، تېنگلیک و انسان قدر-قیمتی» کبی تمایللرگه ضد اېکنلیگینی تاکیدلهگن.
