بیرلشگن ملتلر تشکیلاتی باش کاتبی «اوروش بیلن باغلیق جنسي زۉروانلیک» حقیدهگی گزارشیده اۉتگن ییلی بیرلشگن ملتلر تشکیلاتی نینگ افغانستاندهگی یاردم ادارهسی (یوناما)۲۱ ته عیاللرگه نسبتاً جنسي زۉروانلیک حالتینی قید اېتگنینی ایتگن.
بیرلشگن ملتلر تشکیلاتی خوفسیزلیک کېنگشیگه یقینده تقدیم اېتیلگن اوشبو گزارشگه کۉره، حجتلشتیریلگن حالتلر آرهسیده زۉرلش، گروه بۉلیب زۉرلش، مجبوري نکاح و مجبوري یېچینتیریش کبی جنایتلر بار بۉلیب، اولر۱۵ نفر عیال و۶ نفر قیزگه نسبتاً صادر اېتیلگن همده طالبان وکیللریگه، جملهدن اوشبو گروه نینگ خوفسیزلیک کوچلریگه علاقهدار دېب کۉرسهتیلگن.
بیرلشگن ملتلر تشکیلاتی باش کاتبی،۲۰۲۱ ییلده قبول قیلینگن مجبوري نکاحنی تعقیقلشگه قرهمهی، طالبان مجبوري نکاحلرنی عملگه آشیریش و قۉللب-قوّتلشده اشتراک اېتهیاتگنینی ایتگن.
بیرلشگن ملتلر تشکیلاتینینگ افغانستاندهگی انسان حقوقلری بۉییچه مخصوص گزارشگلری، طالبان نینگ جندر سیاستیگه قرشی چیقهدیگن یاکه اونگه ناراضیلیک بیلدیرهدیگن عیاللر اۉزباشیمچهلیک بیلن حبسگه آلینهیاتگنینی، حبسدهگیلر اېسه قییناقلر و یامان معاملهگه، جملهدن جنسي زۉروانلیککه دچار بۉلهیاتگنینی خبر قیلگن.
طالبان حاضرچه بیرلشگن ملتلر تشکیلاتی باش کاتبی نینگ اوشبو گزارشیگه مناسبت بیلدیرمهگن.
طالبان نینگ بېش ییللیک حکمرانلیگی دوامیده اوشبو گروه قماقخانه و حبسخانهلرده زۉرلش کبی جنسي زۉروانلیک حالتلری حقیده کۉپلب گزارشلر نشر قیلینگن.
بیرلشگن ملتلر تشکیلاتی باش کاتبی طالباندن جنسي زۉروانلیک نینگ برچه تورلرینی زودلیک بیلن توختهتیشنی همده عیاللر و قیزلر نینگ حقوقلری و اساسي اېرکینلیکلرینی چېکلاوچی برچه قانون، سیاست و ترتیب-قاعدهلرنی بېکار قیلیشنی طلب قیلگن.
او طالبان افغانستان نینگ خلقارا مجبوريتلری همده بیرلشگن ملتلر تشکیلاتی خوفسیزلیک کېنگشی نینگ تېگیشلی قرارلریگه، جملهدن۲۶۸۱ (۲۰۲۳ ) قطعنامهگه رعایه قیلیشی کېرهکلیگینی تأکیدلهگن.
بیرلشگن ملتلر تشکلیاتی باش کاتبی، شونینگدېک، طالباندن عیاللرنینگ بیرلشگن ملتلر تشکیلاتی و نادولت تشکیلاتلرده ایشلشیگه قۉییلگن تعقیقنی بېکار قیلیشنی سۉرهگن.
طالبان حاکمیتگه قَیتگچ، عیاللر و قیزلرنی تعلیم و محنت قیلیش حقوقیدن محروم قیلگن.
گروه نینگ چېکلاولری سۉنگگی ییللرده ینه-ده کوچهیتیریلگن.
طالبان حتی اۉتگن ییلی عیاللر نینگ یاردم تشکیلاتلریده ایشلشینی هم منع قیلگن.
