بریتانیا مخصوص کوچلری سابق شتب باشلیغینینگ ایتیشیچه، افغانستاندهگی مخصوص هوا خدمتی (اسایاس)گه عاید اوروش جنایتلری حقیدهگی عیبلاولر حربي پولیسگه یوباریلمهگن، چونکه بو حربيلرنینگ روحیتیگه سلبي تأثیر کۉرسهتیشی ممکن اېدی.
بیبیسی جمعه کونی (۸ جوزا) نشر قیلگن گزارشیده اوشبو سابق حربي عملدار بو معلوماتنی «افغانستان بۉییچه مستقل تېرگاو کمیسیونی»گه بېرگن کۉرستمهسیده آشکار قیلگنینی یازدی.
بریتانيا نینگ اسایاس بۉلینمهلری ۲۰۰۹–۲۰۱۴-ییللر آرهلیغیده افغانستانده جایلشتیریلگن اېدی.
سابق شتب باشلیغینینگ سۉزلریگه کۉره، اسایاس تامانیدن صادر اېتیلگنی ایتیلهیاتگن اوروش جنایتلری ۲۰۱۰–۲۰۱۳-ییللر آرهسیده یوز بېرگن.
اۉشه دورده مخصوص کوچلردهگی ایکّینچی اېنگ یوقاری لوازملی عملدار بۉلگن بو افسر نینگ ایتیشیچه، عیبلاولر ایکّی سببگه کۉره رسمي روشده خبر قیلینمهگن.
اونینگ تأکیدلشیچه، بیر تاماندن رسمي تېرگاو حربي عملیاتلرنی ایزدن چیقریشی و عسکرلر روحیتیگه سلبي تأثیر کۉرسهتیشی ممکنلیگی حقیده خواطر بۉلگن. ایکّینچی تاماندن اېسه اَیریم دلیللر مخصوص کوچلرنینگ رقیب پولکی آرقهلی آلینگن اېدی.
نتیجهده بریتانيا حربي پولیسی ییللر دوامیده مخصوص کوچلر آرهسیده موجود بۉلگن «محکمهسیز قاتللیکلر» و «ساخته حساباتلر تیارلش» حقیدهگی خواطرلردن بېخبر قالگن.
مذکور حربي نینگ گواهلیک بېریشیچه، عیبلاولر جدّي بۉلیشیگه قرهمهی، بریتهنيا مخصوص کوچلری رهبری۲۰۱۱-ییلده مسألهنی قیراللیک حربي پولیسسیگه یوبارمسلیککه قرار قیلگن و بو نینگ اۉرنیگه مخصوص کوچلر قۉلهگن تاکیتیک یوزهسیدن ایچکی تېکشیروو اۉتکزیشنی بویورگن.
افغانستاندهگی بریتانيا حربي عملیاتلریگه عاید مخفي حجتلر کۉپلب عملیاتلر دوامیده اوّل قۉلگه آلینیب، قۉللری کیشنلنگن شخصلر کېینچهلیک مخصوص کوچلر تامانیدن اۉلدیریلگنینی کۉرسهتهدی.
بیبیسی ینگی حجتلرگه تهیهنیب شوندهی یازهدی: «بعضی عملیاتلرده اۉلدیریلگنلر سانی واقعه جاییدن تاپیلگنی ایتیلگن قوراللر سانیدن کۉپراق بۉلگن. اۉلدیریلگنلر و تاپیلگن قوراللر سانی اۉرتهسیدهگی نامتناسبلیک، عسکرلر یاکه باشقهلر حیاتیگه بېواسطه تهدید سالمهگن آدملر هم اۉلدیریلگنینی انگلهتهدی.»
گزارشگه کۉره، بریتانیا مخصوص کوچلری شتبی افغانستان اوروشینی یقیندن کوزهتیب بارگن مشهور خلقارا تشکیلات نینگ شکایتلریدن هم خبردار بۉلگن. بوندن تشقری، افغانستان مخصوص کوچلری هم بیر نېچه بار اعتراض بیلدیرگن و فقرالرنینگ اۉلدیریلیشی دېب حسابلهگن حالتلردن شو قدَر غضبلنگنکی، اَیریم عملیاتلرده بریتانيا مخصوص کوچلری بیلن همکارلیک قیلیشدن باش تارتگن.
«ان۲۲۵۲» کود نامی بیلن تنیلگن حربي عملدار «افغانستان بۉییچه مستقل تېرگاو کمیسیونسی»گه ۲۰۱۱-ییلده حربي پولیس بو خواطرلردن خبردار بۉلگنیده، اسایاس نینگ طالبان اعضالری و یۉل بۉییدهگی بۉمبه قۉیووچیلرنی تعقیب قیلیش عملیاتلری ایزدن چیقیشینی ایتگن.
او شوندهی دېگن: «سیز بو بۉلینمهنی عملیاتلردن چېتلشتیرردینگیز، تېرگاو باشلردینگیز و عسکرلر کېینگی عملیاتینی رېجهلشتیریش اۉرنیگه تېرگاو حقیده اۉیلش بیلن بند بۉلردی. بو، شونینگدېک، بریتانيا مخصوص کوچلری ایچیدهگی ایشانچنی هم ضعیفلشتیرردی.»
افغانستاندهگی بریتانيا مخصوص کوچلریگه عاید اوروش جنایتلری و اولر اوستیدن یېترلی نظارت بۉلمهگنی حقیدهگی معلوماتلر باشقه خارجي حربيلر، جملهدن آسترليالیک عسکرلر هم شونگه اۉخشش عیبلاولرگه دوچ کېلهیاتگن بیر پیتده آشکار بۉلماقده.
امریکا باشچیلیگیدهگی ناتو حربي عملیاتی ۲۰۰۱-ییلده باشلنگن بۉلیب، بریتانيا اونده فعال اشتراک اېتگن. عملیات ۲۰۱۴-ییلگچه دوام اېتدی.
ناتو کوچلرینینگ اساسي قِسمی چیقیب کېتگنیدن سۉنگ، امریکا نینگ اَیریم حربيلری ۲۰۲۱-ییلگچه افغانستانده قالگن و جمهوریت توزومی نینگ قولهشی همده طالبان نینگ حاکمیتگه قَیتیشی بیلن مملکتنی ترک اېتگن.
حاضرده بریتانيا و آسترليا کبی اَیریم دولتلر افغانستان اوروشی دوریدهگی حربي فعالیتلرینی قَیته کۉریب چیقماقده. اوروش جنایتلری حقیدهگی عیبلاولرنی تېرگاو قیلیش هم انه شو جریان نینگ بیر قِسمی حسابلنهدی.
