طالبلر مدافعه وزیری محمد یعقوب مجاهد، مسکو خلق ارا خوفسیزلیک کنفراسسیده اوشبو گروه افغانستانده زمانونی مدافعه تیزیمینی یرهتماقچی اېکنینی ایتدی.
طالبلر مدافعه وزیری کنفراسدهگی نطقیده بوندهی تیزیم نهفقط افغانستان خوفسیزلیگینی تأمینلشی، بلکه منطقهده برقرارلیکنی مستحکملشده هم ایجابي رۉل اۉینشی ممکنلیگینی ادعا قیلدی.
او بوندهی تیزیم قندهی یرهتیلیشی همده اونگه ضرور تخنیکي جهازلر و مالیوي امکانیتلر قندهی تأمینلنیشی حقیده ایضاح بېرمهدی.
محمد یعقوب مجاهد اوشبو ییغیلیشده بیرار دولت یاکه گروه نامینی تیلگه آلمهگن حالده، «بعضی تامانلر افغانستاندهگی وضعیتنی بېقرارلشتیریشگه اورینماقده و اۉز منفعتلری یۉلیده مملکتده یوزهگه کېلگن خوفسیزلیکنی ایزدن چیقرماقده»، دېدی.
او «ناتۉغری حساب-کتابلر» بیلن افغانستانگه ارهلشهیاتگنلر اۉزلرینینگ «ظالمانه مقصدلری»گه اېریشه آلمهسلیگی و مغلوبیتگه اوچرهشیدن آگاهلنتیردی.
بو بیاناتلر طالبان و پاکستان اۉرتهسیدهگی سۉنگّی ماجرا باشلنگنیگه تۉرت آیدن آشگن بیر پیتده ینگرهماقده. ایکّی تامان حلی هم اوشبو ماجرانی توگهتیش بۉییچه کېلیشووگه اېریشه آلمهگن.
حاضرده ایکّی تامان دُرهند چیزیغینینگ هر ایکّی طرفیدهگی قبیله آقسقاللری واسطهچیلیگیده چېگرهدهگی هجوملرنی تۉختهتگن، بیراق سیاسي و سودا علاقهلرینی قَیته تیکلهمهگن و چېگرهلر همان یاپیق قالماقده.
