غزنی ولایتینینگ مالستان اولسواللیگیده سوو بندیده چۉمِیلهیاتگن اوچ نفر اۉسمیر سووگه چۉکیب کېتیب جان بېرگن.
مالستان اهالیسیدن بیرینینگ «اطلاعات روز»گه ایتیشیچه، اوشبو اوچ اۉسمیر اۉقووچی بۉلیب، پشی منطقهسی اهالیسی اېدی. اولر هییت نینگ بیرینچی کونی دَم آلیش اوچون شېرداغ حدودیدهگی سوو تۉغانیگه بارگن.
منبع نینگ توشونتیریشیچه، دستلب اۉسمیرلردن بیری چۉکهیاتگن بۉلگن، قالگن ایکّی نفری اېسه اونی قوتقریش اوچون کېتمه-کېت سووگه توشگن. بیراق آخر-عاقبت اوچهلهسی هم چۉکیب، هلاک بۉلگن.
منبعنینگ قۉشیمچه قیلیشیچه، اوشبو اۉسمیرلرنینگ جسدلری۲۴ساعتدن کېین، غزنی مرکزیدن یېتیب کېلگن قوتقروو کوچلری تامانیدن بوگون پنجشنبه،۷ جوزا کونی سوودن آلیب چیقیلگن.
منبع بو فاجعهگه سوزیشنی بیلمسلیک و احتیاطسیزلیک سبب بۉلگنینی ایتدی.
سووده چۉکیب هلاک بۉلیش مملکتدهگی اېنگ کۉپ اوچرهیدیگن اۉلیملی حادثهلردن بیری بۉلیب، اینیقسه یاز موسمیده بوندهی حادثهلر کۉپهیهدی.
هفته باشیده هم پکتیکا ولایتینینگ ارگون تومنیده اوچ نفر یاش سووگه چۉکیب هلاک بۉلگن اېدی.
احتیاطسیزلیک همده دریالر و سوو انبارلری یقینیده قوتقروو جهازلری و خدمتلرینینگ یۉقلیگی بوندهی حادثهلرنینگ اساسي عامللریدن بیری صفتیده کۉریلماقده.
