افغانستان شیعهلرینینگ دیني مرجعلریدن بیری آیتالله واعظزاده بهسودی، طالبان نینگ شیعه جمعیتیگه باسیمینی تنقید قیلیب، بو گروه حکومتی نینگ قولاغی شیعهلر نینگ طلبلرینی اېشیتیشده «کر» اېکنینی ایتدی.
آیتالله واعظزاده بهسودی چهارشنبه کونی (۶جوزا) کابلده قربان هییتی نمازیدهگی نطقیده طالبان شیعهلرگه قرشی دیني باسیملرنی کوچهیتیرگنینی ایتدی.
اونینگ سۉزلریگه کۉره، قوراللنگن کۉچمنچیلرنینگ هزارهجات منقطهلریگه کیریب باریشی کۉپهیگن، شیعه طلبهلر بیلیم یورتلرده مذهبینی اۉزگرتیریشگه مجبور قیلینماقده و شیعه علمالرینینگ حرمتی هم پایمال قیلینماقده، بیراق شیعهلرنینگ شکایتلریگه اعتبار بېریلمهیپتی.
آیتالله واعظزاده بهسودی قوراللنگن کۉچمنچیلر تورلی حدودلردن هزارهجاتگه، جملهدن میدان وردک نینگ بهسود اولسواللیگیگه باستیریب کیریب، محلي اهالیگه نسبتاً زۉرآورلیک و حتا قاتللیک صادر اېتهیاتگنینی، اما قربانلرنینگ شکایتلری کۉریب چیقیلمهیاتگنینی ایتدی.
اونینگ قۉشیمچه قیلیشیچه، سۉنگّی بېش ییل دوامیده شیعه علمالری یخشی نیت بیلن حرکت قیلگن، بیراق «اسلامي امیرلیک نینگ قولاغی کر».
بو شیعه عالِمینینگ ایتیشیچه، طالبلرنینگ یوقاری مرتبهلی عملدارلری نهفقط شیعه علمالریگه اوچرهشوو امکانینی بېرمهیپتی، بلکه طالبان رهبریگه یوباریلگن۲۰۰ صحیفهلیک مکتوب هم ایکّی ییلدن بویان جوابسیز قالماقده.
بهسودی: «شیعهلرگه باسیم کوندن-کونگه کوچهیماقده. بیلیم یورتلریدهگی شیعه طلبهلریدن یا حنفی مذهبیگه اۉتیش یاکه یونیورسیتینی ترک اېتیش حقیده مجبوري تیلخط آلینماقده. شونینگدېک، جعفري مذهبیگه عاید موضوعلر اۉقوو دستوریدن آلیب تشلنگن.»
یقینده «اطلاعات روز»گه یېتیب کېلگن حجتلر طالبان بیلیم یورتلر محصللردن حنفی مذهبیگه عمل قیلیش حقیده مجبوري تعهدنامهلر آلهیاتگنینی کۉرستگن اېدی.
بو تعهدنامهلر۱۴ ته انیق و چېکلاوچی بندنی اۉز ایچیگه آلیب، محصللرنینگ کيینیش اسلوبی و تشقی کۉرینیشیدن تارتیب دیني اعتقادی همده اجتماعي خلق-اطواریگچه بۉلگن جهتلرنی قمرهب آلهدی.
واعظزاده بهسودی «آدملرنی مذهبینی اۉزگرتیریشگه مجبور قیلمسلیک کېرهک. بو ایش فایده هم بېرمهیدی، فقط مصافه، رنجیش و اعتراضلرنی کوچهیتیرهدی»، دېب تأکیدلهدی.
آلدین هم بیر نېچه بار طالبان سیاستینی تنقید قیلگن آیتالله واعظزاده بهسودی کۉره، شیعه علمالریدن عامهوي اخبارات واسطهلریده گپیرمسلیک طلب قیلینگن.
او شیعه علمالریدن بیری نینگ حبسگه آلینیشی حقیده گپیریب، شوندهی دېدی: «شیعه علمالرینینگ حرمتی بوزیلماقده؛ نهفقط طلبهلر، بلکه یوقاری مرتبهلی علمالر هم چقیرتیریلیب، اولردن وقتینچهلیک نکاح اۉقیمسلیک حقیده تیلخط آلینماقده. حالبوکه، وقتینچهلیک نکاح فقط بهانه.»
طالبان یقینده کابلنینگ غربي قِسمیده یاش جُفتلیککه نکاح اۉقیگنی اوچون بیر شیعه دیني عالِمینی حبسگه آلیب، کلتکلهگن اېدی.
طالبان حاکمیتگه قَیتگنیدن سۉنگ افغانستانده دیني اېرکینلیک کېسکین چېکلنیب، دیني آزچیلیکلر، جملهدن شیعهلر باسیم آستیده قالماقده.
بو گروه شیعهلرنینگ شخصي حالت قانونینی بېکار قیلگن و نکاح همده عایلهوي مسألهلرنی حنفی فقه اساسیده حل اېتیب کېلماقده.
