«افغانستان آزادلیک جبههسی» نینگ ایتیشیچه، طالبان گروهی نهفقط خلق نینگ جسماني و روحي خوفسیزلیگینی یۉق قیلگن، بلکه افغانستاننی یشاوچیلر اوچون کتّه قماقخانهگه ایلنتیرگن.
اوشبو جبهه بوگون (چهارشنبه،۶ جوزا) قربان هییتی مناسبتی بیلن بېرگن بیاناتیده طالبان «میلیونلب انسانلرنی کۉچیریلیشگه مجبور قیلگن، ملي نهادلرنی یۉق قیلگن، مملکت اقتصادینی برباد قیلگن و نتیجهده یورتیمیزنی منطقوي همده خلقارا تروریستیک گروهلر اوچون میدان و باشپناه مرکزیگه ایلنتیرگن»، دېب ایتگن.
«افغانستان آزادلیک جبههسی»نینگ ینه قۉشیمچه قیلیشیچه، قریب بېش ییللیک طالبان حکمرانلیگی «مملکت کېلهجگینی هر قچانگیدن هم قارانغی و امیدسیز حالگه کېلتیردی».
جبهه بیاناتیده شوندهی دېییلهدی: «طالبان حکمرانلیگی نینگ دوام اېتیشی ملي بیرلیک نینگ بوتونلهی یېمیریلیشی، اجتماعي پرچهلنیش و مدني موزلشنی انگلهتهدی. ملي بایلیکلرنینگ تالان-تاراج قیلینیشی، جهالت و سوادسیزلیک نینگ کېنگهییشی، تېنگسیزلیک و کمسیتیش نینگ چوقورلشیشی همده کېلهجک اولادنینگ آرقهگه تارتیلیشی- بولرنینگ برچهسی طالبان باشقرووی و اولرنینگ آرقهده قالگن تفکری نینگ طبيعي عاقبتی دیر.»
«افغانستان آزادلیک جبههسی» سیاسي گروهلر و فعاللردن اېتنیک، تیل و دیني ضدیتلرنی کوچهیتیرمسلیکنی سۉرهگن همده حاضرگی وضعیتده «افغانستان آلدیدهگی اېنگ کتّه معما و اساسي دشمن طالبان نینگ باسقینچیلیک رژیمی و اولرنینگ نفرتگه اساسلنگن مفکورهسی» اېکنینی تأکیدلهگن.
مذکور جبهه : «اېتنیک، تیل، حدودي و دیني کېلیشماوچیلیکلرنی کوچهیتیریش فقط طالبان حکمرانلیگی نینگ دوام اېتیشیگه خدمت قیلهدی دېگن.»
شونینگدېک، اولر «افغانستاننی قوتقریش اوچون قالگن آزگینه امکانیتلرنی اۉزارا فتنه و بۉلینیشلر بیلن یۉقاتمسلیک»که چقیرگن.
جبهه آخریده خلقنی «بیرلیک و همجهتلیککه چقیریب، ظلم و باسیمگه قرشی کورهشهیاتگن کوچلرنی قۉللب-قوّتلش»گه اوندهگن.
طالبان حاکمیتنی قَیته اېگهلهگنیدن بېری مملکتده کېنگ کۉلملی چېکلاولر جاري اېتیلگن بۉلیب، اولر انسان حقوقلری و اجتماعي حیات بارهسیده کۉپلب تنقیدلرگه سبب بۉلماقده.
سۉنگّی پیتلرده اېسه اجتماعي ترماقلرده اېتنیک و تیلگه عاید بحثلر کېسکین آشیب، تورلی گروهلر اۉرتهسیدهگی قرهمه-قرشیلیکلر کوچهیگن.
