افغانستاننینگ سابق جمهور رییسی حامد کرزی قربان هییتی مناسبتی بیلن یۉلهگن تبریکیده: «افغانستان اوشبو قدیمي یورتنینگ برچه خلقلری اوچون عمومي اوی دیر»، دېدی.
بوگون (چهارشنبه، ۶ جوزا) نشر قیلینگن اوشبو هییت پیامیده کرزی: «مملکتیمیز ترقیات و رواجلنیشگه محتاج. اما ترقیات و فراوان حیات فقط بیز بیرلشگن و بیلیملی ملت بۉلگنیمیزده، برچه وطنداشلریمیز اۉز یورتیده اېگهلیک حسینی تویگنیده همده یاش، کوچلی و علم-فن، صنعت و تفکر بیلن قوراللنگن انسان منبعلریگه اېگه بۉلگنیمیزده عملگه آشهدی»، دېگن.
سابق جمهور رییس، «بو مقصدگه اېریشیش اوچون ینه بیر بار امید بیلدیرهمن- مکتب و بیلیم یورتلری اېشیکلری امکان قدَر تېزراق قیزلر اوچون آچیلسین و عیاللر همده تحصیل آلگن متخصصلر اوچون ایشلش امکانیتلری یرهتیلسین.»
شونینگدیک سابق جمهور رییس، سوو تاشقینیدن ضرر کۉرگنلر و افغانستانگه قَیتگن مهاجرلرگه یاردم کۉرسهتیشگه چقیردی.
حامد کرزی بوندن آلدین هم بیر نېچه بار قیزلر اوچون مکتب و بیلیم یورتلرنی قَیته آچیشگه همده عیاللر ایشیگه قۉییلگن چېکلاولرنی بېکار قیلیشگه چقیرگن اېدی.
بیراق طالبان حاضرگچه بوندهی چقیریقلرگه اعتبار قرهتمهگن و عیاللرگه قرشی چېکلاولرنی کېنگهیتیریشده دوام اېتماقده.
