افغانستان سابق ملي خوفسیزلیک ریاستینینگ باشلیغی رحمتالله نبیل، ایران یقین کېلهجکده طالباننی افغانستان حکومتی صفتیده تن آلیشی ممکنلیگینی ایتدی.
نبیل دوشنبه (۴ جوزا) ایکس اجتماعی ترماغیده یازیشیچه، ایران بونی ژئوپولیتیک منفعتلر اساسیدهگی کېلیشوو دایرهسیده عملگه آشیریشی احتمالی بار.
نبیلنینگ تاکیدلهشیچه، «معلوماتلرگه کۉره، یقین کېلهجکده ایران اسلام جمهوریتی طالبان حکومتینی تن آلیشی ممکن.»
اونینگ قۉشیمچه قیلیشیچه، بو قرار پرینسیپلر اساسیده اېمس، بلکه ژئوپولیتیک منفعتلر و «مجبوري رئال وضعیتنی قبول قیلیش» نتیجهسیده بۉلهدی.
نبیل، طالباننی تن آلیش برقرارلیک هم، مشروعیت آلیب کېلمهیدی دېب آگاهلنتیرگن.
او شوندهی دېگن: «شوندهی حکومتنی تن آلیش بو عیاللرنی جمعیتدن چیقریب تشلهگن، اېرکینلیکنی باستیرگن و افغانستاننی تاریخي یکّهلنیشگه آلیب کېلگن توزومگه مشروعیت بېریش دیر. بو نه برقرارلیک کېلتیرهدی، نه قانونيلیک.»
اونینگ فکریچه، بو فقط بحراننی چوقورلشتیرهدی و افغانستان خلقینی منطقوي سیاسي اۉیینلر نینگ قربانیگه ایلنتیرهدی.
طالبان حاکمیتگه قَیتگنیگه قریب بېش ییل بۉلسه-ده، حاضرگچه فقط روسيه اولرنی رسمي حکومت صفتیده تن آلگن. ایران اېسه حلی تن آلمهگن، اما رېجیم قولهشی آرتیدن افغانستان اېلچیخانه و قنسوللیکلرینی طالبانگه تاپشیرگن و اولر بیلن دیپلوماتیک علاقهلر اۉرنهتگن ایلک دولتلردن بیری بۉلگن.
