مملکتنینگ تانیقلی آوازخوانی فرهاد دریا «هزاره مدنیت کونی» مناسبتی بیلن اۉتکزیلگن ییریک تدبیرده افغانستاندهگی مدني خیلمه-خیللیکنی قبول قیلیش ضرورلیگینی تأکیدلب، او بیر کون کېلیب هېچ بیر آنه فرزندینینگ اېتنیک کېلیب چیقیشی سببلی کۉز یاش تۉکمهیدیگن کون کېلیشینی آرزو قیلهمن دېب تیلگه آلگن.
دریا جنابلری یکشنبه کونی (۳جوزا) امریکانینگ واشنگتن دیسی ایالتیده «هزاره مدنیت کونی» مناسبتی بیلن اۉتکزیلگن ییغینده سۉزگه چیقیب، «بوگونگی ییغیلیش فقط بیرهم اېمس، بو بیر پیام دیر. هزاره مدنیتی تیریک، هزاره هویتی تیریک و هزاره خلقی تیریک دیر.»
او، اۉز تاریخیده زۉراورلیک و کۉچیشلرنی باشدن کېچیرگن، بوگون اېسه باشقه مملکتده اۉز مدنیتینی سقلب قالهیاتگن انسانلرگه خطاب قیلیب، قۉشیمچه قیلیشیچه، «بیر ملت اۉز مدنیتینی کېلهجک اولادلرگه محبت بیلن تاپشیرر اېکن، اونی هېچ قندهی کوچ یۉق قیله آلمهیدی.»
او ینه شوندهی آرزوسینی بیلدیردی: «مېن جوده عزیز بیر آرزو قیلهمن. شوندهی کون کېلسینکی، یورتیمیزده هېچ بیر باله اۉز کیملیگی سببلی قۉرقمهسین، هېچ بیر آنه فرزندینینگ اېتنیک کېلیب چیقیشی اوچون ییغلمهسین.»
مملکت اوشبو تانیقیلی صنعتچیسینینگ تأکیدلشیچه، بو کون فقط بیر اېتنیک گروه نینگ غلبهسی اېمس، بلکه انسانیت غلبهسی بۉلهدی.
او افغانستانده بیر-بیرینی قبول قیلیش و خیلمه-خیللیککه حرمت مهملیگینی ایتیب، «مملکت برچه رنگلری بیلن گۉزل بۉلهدی» دېگن فکرنی اورغولهدی.
فرهاد دریا یاش هزارهلردن اۉز حکایهلرینی اۉزلری یازیشنی سۉرهدی و اولرنی فقط آغریق بیلن اېمس، بلکه مدنیت، بیلیم و کېلهجک بیلن هم تنیتیش کېرهکلیگینی تأکیدلهدی.
«هزاره مدنیت کونی» ۲۰۱۷-ییلدن بېری ۱۹-می کونی نشانلنهدیگن مدني سنه بۉلیب، بوگون او دنیانینگ تورلی مملکتلریدهگی هزاره دایسپارهسی تامانیدن کېنگ طرزده بیرهم قیلینهدیگن تدبیرگه ایلنگن.
اما بو مناسبت حاضرده بوتون دنیادهگی هزارهلر آرهسیده بیر بیرهمگه ایلنگن بۉلیب، می آیی دوامیده آسیا، اروپا، امریکا و آسترليانینگ تورلی شهرلریده، شونینگدېک افریقا دولتلریدهگی هزاره مهاجرلری آرهسیده هم کېنگ نشانلنهدی.
