محلي منبعلر دایکندی ولایتیده بیر اېرکک کیتی اولسواللیگیدهگی مسجد نمازخوانلریگه «طالبلر حربي کییمیدهگی قوراللی شخصلر» تونده اونینگ اوییگه باستیریب کیریب، کۉز اۉنگیده خاتینی و قیزیگه تجاوز قیلگنینی ایتگنینی معلوم قیلدی.
منبعلرگه کۉره، بو اېرکک۱۰ کون اوّل (جمعه،۲۵ ثور) کیتی تومنی مرکزیدهگی جامع مسجدیده جمعه نمازیدن سۉنگ نمازخوانلرگه شکایت قیلیب، اگر اونگه یاردم بېریلمسه «اۉز جانیگه قصد قیلیشینی» ایتگن.
منبعلر بېرگن معلوماتلرگه کۉره، اېرککنینگ ایتیشیچه، اوشبو شخصلر چهارشنبه کونی(۲۳ثور) تونگی ساعت تخمیناً 2:00 ده «تینتوو» بهانهسی بیلن کیتی مرکزیدهگی پسینک قیشلاغیدهگی اوییگه کیرگن، اونی کلتکلهگن، قۉللرینی باغلگن و سۉنگ کۉز اۉنگیده خاتینی همده قیزیگه تجاوز قیلگن.
منبعلرنینگ ایتیشیچه، او مسجددهگی آدملرگه تجاوز قیلگن شخصلر اۉزلرینی «طالبان خادملری» دېب تنیشتیرگنینی، او اېسه اولر نینگ «محلي اېمسلیگی»نی و «حربي کییم» کيگنینی پَیقهگنینی بیلدیرگن.
محلي منبعلرگه کۉره، آقسقاللر بو اېرکککه طالبان مسووللریگه مراجعت قیلیب، اوشبو «جنایت» عیبدارلرینی انیقلش و جزالش همده بوندهی حادثهلرنینگ تکرارلنیشی نینگ آلدینی آلیشنی طلب قیلیشگه وعده بېرگن.
خبرلرگه قرهگنده، اېرکک نینگ شکایتیدن بیر کون اۉتیب طالبان نینگ محلي مسووللری و محله آقسقاللری بو مسألهنی محاکمه قیلیش اوچون ییغیلیش اۉتکزگن.
منبعلرگه کۉره، طالبان مسووللری اوشبو اویگه باستیریب کیریش و عیال همده قیزگه تجاوز قیلیش اولرنینگ کوچلری تامانیدن عملگه آشیریلمهگنینی ایتگن، بیراق حاضرگچه بو واقعه یوزهسیدن باشقه هېچ قندهی تېکشیروو آلیب باریلمهگن.
محلي اهالی اېسه اوشبو تجاوز اوچون طالباننی جوابگر دېب بیلماقده و حدودده بو گروه اعضالریدن باشقه قوراللی یاکه محلي بۉلمهگن شخصلر یۉقلیگینی تأکیدلهماقده.
طالبان افغانستان اوستیدن قَیته نظارت اۉرنهتگنیدن بویان اوشبو گروه اعضالری نینگ تورلی ولایتلرده عیاللر و قیزلرگه نسبتاً جنسي تجاوزلری حقیده بیر نېچه بار خبرلر ترقهلگن.
طالبان مسووللری اېسه اۉز اعضالری نینگ بوندهی حادثهلرگه علاقهدارلیگینی تصدیقلهمهگن و بوندهی جنایتلرنی صادر اېتگن شخصلر «اسلامي قانونلر اساسیده» جزالنیشینی بیلدیرگن.
