طالبلر تشقی ایشلر وزیری امیرخان متقي، جاپاننینگ افغانستاندهگی اېلچیسی کنیچی ماساموتو بیلن اوچرهشیب، مذاکره اۉتکزدی.
طالبلر تشقی ایشلر وزیرلیگی بوگون (یکشنبه،۳ جوزا) کېچقورون ترقهتگن بیاناتیده ایتیلیشیچه، اوچرهشووده منطقهدهگی جاري وضعیت همده افغانستان و جاپاننینگ اۉرتهسیدهگی ایکّی تامانلهمه مناسبتلرنی رواجلنتیریش مسألهلری محاکمه قیلینگن.
امیرخان متقي اوچرهشوو دوامیده جاپاننینگ افغانستان سیاستیده مهم اۉرینگه اېگه اېکنینی تأکیدلهگن. او جاپاننینگ افغانستان خلقیگه کۉرستگن یاردملری، «افغانستاننینگ حقیقي وضعیتینی توشونیشی»، ایجابي موضعی و طالبان نظارتیدهگی افغانستاننی منتظم قۉللب-قوّتلهیاتگنی اوچون منّتدارلیک بیلدیرگن.
طالبان تشقی ایشلر وزیرلیگی بیاناتیگه کۉره، جاپان اېلچیسی مملکتی افغانستانگه تورلی ساحهلرده یاردم و همکارلیک قیلیش مجبوريتیگه صادق اېکنینی و بو همکارلیک دوام اېتیشینی ایتگن.
وزیرلیکنینگ معلوم قیلیشیچه، اوچرهشوو یکونیده تامانلر ایکّی تامانلهمه علاقهلرنی ینه-ده رواجلنتیریش، انسانپرورلیک ساحهدهگی موافقلشتیریش و اۉز ارا همکارلیکنی کوچهیتیریش همده تخنیکي اوچرهشوولرنی دوام اېتتیریش ضرورلیگینی تأکیدلهگن.
جاپان طالبلر افغانستان اوستیدن قَیته نظارت اۉرنهتگنیدن بېری اوشبو گروه بیلن علاقهلرنی دوام اېتتیریب کېلماقده و کابلدهگی اېلچیخانهسینی یاپمهگن.
شونینگدېک، جاپان شو دور مابینیده افغانستانگه اساسي دونر دولتلردن بیری بۉلیب قالماقده، بیراق یاردملرنینگ کتّه قِسمینی اساسن بیرلشگن ملتلر تشکیلاتلری آرقهلی یېتکزیب بېرماقده.
