محلي منبعلرگه کۉره، دایکندی ولایتینینگ کیتی اولسواللیگیدن بۉلگن ایکّی یاش ییگیت ایران تامان سفر چاغیده ایکّی علیحده واقعهده حیاتدن کۉز یومگن.
منبعلرگه کۉره، بو یاشلرنینگ اسملری « عینالدین بیانی» و « علی ابراهیمی» بۉلیب، اولر سۉنگّی اۉن کون ایچیده ایران سفر یۉلیده وفات اېتگن.
منبعلر معلوماتیگه کۉره، عینالدین بیاني جاري ییل نینگ ۲۰-حمل کونی ناقانوني یۉل بیلن ایران تامان کېتهیاتگنده، ایران نینگ شیراز شهری حدودیده صادر بۉلگن ترافیک حادثهسیده هلاک بۉلگن.
منبعلرنینگ ایتیشیچه، علی ابراهیمی اېسه جاري هفته دوامیده نیمروز ولایتیده ایران تامانگه کېتماقچی بۉلگن یۉلاوچیلر و بیر مهمانخانه اېگهسی اۉرتهسیدهگی ماجرا چاغیده پیچاقلب اۉلدیریلگن. او ماجرا طرفلری اۉرتهسیده واسطهچیلیک قیلیشگه اورینهیاتگن پیتده پیچاق ضربهسی بیلن هلاک بۉلگن.
منبعلر معلوماتیگه کۉره، بو یاشلر دایکندی ولایتی کیتی اولسواللیگی نینگ «کیسو» حدودی اهالیسی بۉلیب، قشّاقلیک و ایشسیزلیک سببلی ناقانوني یۉللر آرقهلی ایران تامان ایش ایزلب کېتیشگه مجبور بۉلگنلر.
اوّل هم افغانستان فقرالری نینگ ایران تامان ناقانوني سفرلری دوامیده هلاک بۉلیشی بیلن باغلیق کۉپلب حالتلر قید اېتیلگن.
ایران بیر ییلدن آرتیق وقتدن بېری افغانستان وطنداشلری اوچون ویزه بېریشنینگ عادتي ترتیبینی تۉختهتگن بۉلیب، حاضرده فقط ایرانلیک ایش بېرووچیلردن پیشنهاد آلگن شخصلرگه ایش ویزهسی بېرهدی.
شونینگدېک، ایران مسعود پزشکيان جمهور رییس اېتیب سهیلنگنیدن سۉنگ افغانستان مهاجرلرینی دېپورت قیلیشنی کوچهیتیریب، قریب ایکّی میلیون مهاجر مملکتدن چیقریب یوبارگن.
