افغانستان سابق کانلر و پطرولیم وزیری همده «فراگیر» تشکیلاتی اساسچیسی نرگس نهان، طالبان عیاللرگه قرشی کمسیتیشنی رسمي روشده باشقروو تیزیمیگه کیریتگنینی و هر قندهی فکر، اعتراض همده مخالفتنی جنایت صفتیده بهالهیاتگنینی ایتدی.
نرگس نهان بوگون (دوشنبه، ۲۸-ثور) بریتانیا اعیان مجلسیده «فراگیر» تشکیلاتی نینگ ینگی گزارشینی تقدیم اېتیش مراسمیده سۉزلب، حاضرگی وضعیت نهفقط افغانستان اوچون جدّي تهدید اېکنینی، بلکه گلوبل خوفسیزلیک و برقرارلیککه هم خوف سالهیاتگنینی تأکیدلهدی.
او خلقارا همجميت افغانستان عیاللریگه قرشی تیزیملی کمسیتیشنی «انسانیتگه قرشی جنایت» صفتیده تن آلیشی و اونی جِنایيلشتیریشی کېرهکلیگینی بیلدیردی.
شو بیلن بیرگه، سابق وزیر شوندهی سوالنی اۉرتهگه تشلهدی: دنیا بونگه تیارمی یاکه ینه بیر بار «عیاللر انساني قدر-قیمتینی ژئوپولیتیک سیاستلر قربانیگه ایلنتیرهدیمی؟»
ییغیلیشده اسلام حقوقی و جندر مسألهلری بۉییچه تدقیقاتچی زیبا میر حسینی هم سۉزگه چیقیب، طالبان عیاللرگه قۉییلگن چېکلاولرنی آقلش اوچون دیندن واسطه صفتیده فایدهلنهیاتگنینی ایتدی.
اونینگ تأکیدلشیچه، عیاللر حقوقلری و جندر تېنگلیگی اسلام تعلیماتلریگه ضد اېمس.
حساباتگه کۉره، طالبان افغانستان عیاللرینینگ حقوقلرینی چېکلشنی جمعیتنی نظارت قیلیش و اۉز توزومینی سقلب قالیش اوچون سیاسي واسطه صفتیده ایشلهتماقده.
شونینگدېک، گزارشده طالبان مینگلب دیني مدرسهلر قوریش آرقهلی مملکتده مفکوروي «مییه یوویش» جریانینی کوچهیتیرهیاتگنی، بو اېسه اېکسترېمیزم نینگ کۉپهییشی و کېنگهییشی یوزهسیدن جدّي خواطرلرنی کوچهیتیرهیاتگنی قید اېتیلگن.
«فراگیر» تدقیقاتی ینه شونی کۉرسهتهدیکی، جمعیتده خوفسیزلیککه عاید قۉرقوو و رادیکاللشوو آرتیب بارماقده. دیني و اېتنیک آزچیلیکلر، سابق حکومت خادملری همده خلق ارا تشکیلاتلرده ایشلهگن شخصلر نشانلی زۉرآورلیک خوفی آستیده قالماقده.
