طالبلرنینگ پنجشیر ولایتی والیسی ادارهسی اوشبو ولایتده بیروج کانلرینی قزیب آلیش ایشلری رسماً باشلنگنینی اعلان قیلدی.
طالبلر والیسی سۉزلاوچیسی سیفالدین لتون بوگون (یکشنبه،۲۷ثور) معلوم قیلیشیچه، حاضرچه «بازارک» منطقهسیدهگی بیر کان رسمي روشده ایشگه توشیریلگن بۉلیب، کېلهجکده بو جریان عنابه و آبشار تومنلریگه هم کېنگهیتیریلهدی.
اونینگ قۉشیمچه قیلیشیچه، اوشبو کان اوّل سیناو طریقهسیده قزیب آلینگن و نتیجهلری «ایجابي» بۉلگن.
طالبلر سۉزلاوچیسی عنابه و آبشار تومنلریدهگی فیروزه کانلرینی قزیب آلیش ایشلری هم یقین آرهده باشلنیشینی ایتیب، پودرتچی شرکتلر قزیب آلیش جریانینی یکونلهگنینی بیلدیرگن.
طالبلر آماری معلوماتلریگه کۉره، پنجشیر مرکزی همده عنابه و آبشار اولسواللیکلریده کمیده 20 ته قیمتبها بیروج کانی انیقلنگن.
بو پیتده طالبان افغانستان اوستیدن قَیته حاکمیتنی قۉلگه آلگنیدن بېری پنجشیرنینگ زمرد کانلرینی منتظم قزیب آلیب، محصولاتلرینی ساتیب کېلماقده.
بوندن تشقری، اولر پنجشیردهگی یاقوت و گرینگارنت قزیب آلیشنی هم باشلهگن.
طالبان تامانیدن افغانستان کانلرینینگ قزیب آلینیشی کېنگ تنقیدلرگه سبب بۉلماقده. اَیریم سیاسي آقیملر بو گروهنی مملکت بایلیکلرینی «تالان-تاراج قیلیش»ده عیبلهماقده.
