«افغانستان آزادلیک جبههسی» اۉزی نینگ کماندوی (عملیات) بۉلینمهلری بدخشانده موجودلیگی و فعالیت یوریتهیاتگنینی همده اۉزی نینگ تهیهنچ نقطهلری و قرارگاهلرینی حمایه قیلهیاتگنینی معلوم قیلدی.
مذکور جبهه شنبه آقشامی (۲۶-ثور) اعلان قیلگن بیاناتیده «بهار عملیاتی» بدخشانده باشلنگنینی بیلدیرگن.
«افغانستان آزادلیک جبههسی»نینگ قۉشیمچه قیلیشیچه، سۉنگّی ایکّی آی دوامیده بدخشان ولایتینینگ تورلی حدودلریده بیر نېچه بار طالبان بیلن تۉقنهشوولر و قوراللی جنگلر یوز بېرگن.
اوشبو جبههنینگ ایتیشیچه، سۉنگّی بیر آی ایچیده جورم تومنی نینگ خۉستک درهسیدهگی اولرنینگ تهیهنچ نقطهلری و قرارگاهلریگه قرشی طالبان تامانیدن اویوشتیریلگن کمیده تۉرت مرته هجوم، پیستیرمه و حرکتلر برطرف اېتیلگن و «دشمن کتّه تلفاتلر بیلن چېکینیشگه مجبور بۉلگن».
«افغانستان آزادلیک جبههسی» تامانیدن۱۱ نفر قوراللی کیشی حربي کییم کيگن حالده کامره قرشیسیده تورگنی عکس اېتگن ویدېو هم نشر قیلینگن.
بو قوراللی کیشیلرنینگ سۉزلاوچیسی جبهه کوچلری بدخشان تاغلریده موجود اېکنینی و طالبانگه قرشی قرشیلیک کۉرسهتهیاتگنینی ایتهدی.
طالبان دایما قرشیلیک حرکتلری نینگ قوراللی کوچلری موجودلیگینی رد اېتیب کېلهدی. بیراق بیرلشگن ملتلر تشکیلاتی حساباتلریده «افغانستان ملي قرشیلیک جبههسی» و «افغانستان آزادلیک جبههسی» مملکت نینگ تورلی حدودلریده «فعال» حربي کوچلرگه اېگه اېکنی و طالبان موضعلریگه قرشی هجوملر اویوشتیرهیاتگنی قید اېتیلگن.
بیرلشگن ملتلر تشکیلاتی باش کاتبی انتنیو گوتریش نینگ سۉنگّی خوفسیزلیک گزارشیگه کۉره،۲۰۲۵-ییل۱-نوامبردن ۲۰۲۶-ییل ۳۱جنوریگچه بۉلگن دورده «افغانستان آزادلیک جبههسی» و «افغانستان ملي قرشیلیک جبههسی» طالبانگه قرشی۳۶ ته هجوم اوچون جوابگرلیکنی اۉز ذمّهسیگه آلگن، اولردن۱۴ تهسی بیرلشگن ملتلر تشکیلاتی تامانیدن تصدیقلنگن.
