طالبان باش قاضیسی عبدالحکیم حقّاني قندوز، بدخشان، بلخ، جوزجان و بغلان ولایتلریدهگی اوشبو گروه مسووللریگه اۉز «یوقاری رهبرلری»گه اطاعت قیلیشنی توصیه اېتیب، «چونکه اطاعت اسلامي توزومنی مستحکملش و سقلب قالیش نینگ کتّه واسطهسی دیر»، دېگن.
طالبان عالي محکمهسی بوگون (شنبه،۲۶ ثور) نشر قیلگن بیاناتگه کۉره، عبدالحکیم حقّاني اوشبو بېش ولایتگه قیلگن اۉن کونلیک سفری دوامیده «هر بیر قویی مرتبهلی مسوول اۉزیدن یوقاری رهبریگه بۉیسونیشی کېرهک»لیگینی تأکیدلهگن.
طالبان باش قاضیسی شونینگدېک شوندهی دېگن: «مسوولیت جهنم اوستیدهگی صراط کۉپریگیگه اۉخشهیدی؛ اگر مسوول اۉز ایشینی ناتۉغری بجرسه، قیامت کونی صراط کۉپریگیدن اۉتیش اونگه اۉقدېک قیین بۉلهدی.»
او ینه طالبان عملدارلریدن «جنایتچیلر»نی اۉزباشیمچهلیک بیلن جزالهمسلیکنی همده محبوس و عیبلنووچیلرگه یخشی مناسبتده بۉلیشنی سۉرهگن.
عبدالحکیم حقّاني شونینگدېک اولر حاضرگی «اسلامي توزوم» اوچون الله گه شکر قیلیشلری کېرهکلیگینی ایتیب، بو شکرنینگ معناسی «الله نظامی»نی اوشبو مملکت خلقی اوستیده جاري قیلیش اېکنینی تأکیدلهگن.
طالبان رهبرلری افغانستاننی قَیته اېگهلهگنیدن بویان بیر نېچه بار اۉز عملدارلری و خلقنی رهبر همده حکومتگه «اطاعت قیلیش»گه چقیریب کېلماقده.
شونینگدېک اولر چیقیشلریده اۉز مسووللریدن عدالتلی بۉلیشنی، ظلم قیلمسلیکنی و اۉزباشیمچه جزالردن تيیلیشنی طلب قیلگن.
بیراق بو دور ایچیده طالبان حکومتی محکمهسیز قاتللیکلر، اۉزباشیمچه حبسلر، فقرالرنی قییناققه سالیش همده افغانستان فقرالریگه نسبتاً اېتنیک و کمسیتووچی مناسبتلرده کېنگ عیبلنیب کېلماقده.
