افغانستان خلقینینگ اسلامي بیرلیک حزبی رهبری حاجی محمد محقق، کابلده طالبان تامانیدن شیعه مذهبلی بیر دین عالِمینینگ کلتکلنیشیگه مناسبت بیلدیریب، شیعه مسلمانلرینینگ شخصي (احوالی شخصي) مسألهلری مملکتنینگ عمومي قانونلریدن مستثنا بۉلیشی کېرهکلیگینی ایتدی.
محمد محقق جمعه آقشامی (۲۵ ثور) فیس بوکده یازگن پیامیده اسلامي مملکتلرده عمومي قانونلر بیلن شخصي حالت مسألهلرینی اجرهتیش عادتي حال اېکنینی و بو یاندشوو جمهوریت تیزیمی دوریده هم حسابگه آلینگنینی تأکیدلهدی.
اونگه کۉره، «حقوقي و جنایت ایشلری بۉییچه عمومي قانونلر» همه اوچون بیر خیل بۉلسه-ده، نکاح، طلاق، میراث، فرزند وصيلیگی و دیني عبادتلر کبی «شخصي حالت قانونلری» هر بیر دیني گروهنینگ اۉز اعتقادیگه کۉره ترتیبگه سالینیشی کېرهک.
محمد محقق عراقنی مثال قیلیب کېلتیریب، او یېرده شیعهلر اوچون علیحده دیني محکمهلر، سنّیلر اوچون علیحده محکمهلر موجودلیگینی، نصرانيلر اېسه کلیسا قانونلری اساسیده اۉز دیني ایشلرینی اېرکین یوریتیشینی ایتگن.
اونینگ سۉزلریگه کۉره، افغانستانده هم ایلگری شیعه مذهبینینگ شخصي حالت مسألهلری اۉز فیقه دایرهسیده عملگه آشیریلگن و 2004 ییلگی لویه جرگه تامانیدن قبول قیلینگن اساسی قانونده جعفري مذهبی رسمي تن آلینگن.
محمد محققنینگ تأکیدلشیچه، طالبان «نهفقط جعفري مذهبینی رسميلیکدن چیقردی، بلکه شیعهلرنینگ دیني عملیاتلری و شخصي حالت مسألهلریگه باسیم اۉتکزماقده».
او کابلده شیعه دین عالِمی حسین داد شریفینینگ چقیریلیب، کلتکلنگنینی «حقارت» دېب اتهگن همده طالبان شیعه علمالریگه وقتینچهلیک نکاح (موقت)نی «جنایت» دېب حسابلب، اونی اۉقیگنلرگه آلتی آی قماق جزاسی تهدید قیلهیاتگنینی ایتگن.
شونینگدېک، او دایکندی ولایتی اشترلی تومنیدهگی بیر نزاعگه هم اشاره قیلیب، اونده بیر پشتون اېرکک تورموش قورگن هزاره عیالینی اۉز نکاحیگه آلیشنی دعوا قیلگنی و طالبان تامانیدن عیال عایلهسی نینگ حبسگه آلینگنینی بیلدیرگن.
محمد محقق دیني و ناموسگه عاید باسیملر جمعیتدهگی اجتماعي یاریقلرنی چوقورلشتیریب، عداوتنی کوچهیتیریشی حقیده آگاهلنتیرگن.
او یکونده طالبان مأموریتینی «عقلگه کېلیب، هېچ بۉلمهگنده اۉز منفعتلری اوچون هم آدملرنینگ شخصي حالت مسألهلریگه حرمت بیلن قرهشگه» چقیریب، بو کېسکینلیکلرنینگ عاقبتی هېچ بیر تامانگه فایده بېرمسلیگینی تأکیدلهگن.
حسین داد شریفي اېسه جمعه کونی (۲۵ ثور) کابلنینگ دشت برچی حدودیدهگی مسجدده قیلگن چیقیشیده، بیر یاش جُفتلیک اوچون «وقتینچهلیک نکاح» اۉقیگنلیگی سببلی ۱۸-حوزه گه چقیریلیب، طالبان تامانیدن کلتکلنگنینی معلوم قیلگن.
