جوزجان ولایتیدهگی محلي منبعلر نامعلوم قوراللی شخصلرنینگ شبرغان شهریدهگی بیر اویگه قیلگن هجومی عاقبتیده بیر عیال و اونینگ اوچ قیزی اۉلدیریلگنی، عایلهنینگ اوچ اۉغلی اېسه یرهلنگنی حقیده معلوم قیلدی.
منبعلر اطلاعات روزگه اوشبو حادثه تیناوون تونده (پنجشنبه، ۲۴-ثور) شبرغان شهرینینگ سرپل بندری یقینیدهگی «پمپخانه» منطقهسیده یوز بېرگنینی ایتگن.
منبعلرگه کۉره، «طالبان کوچلری کییمیده بۉلگن» قوراللی شخصلر تونده اویگه باستیریب کیریب، اۉق اوزیش آرقهلی عایله آنهسی و اونینگ اوچ قیزینی اۉلدیرگن، اوچ نفر کیچیک یاشدهگی اۉغیللرینی اېسه یرهدار قیلگن.
معلوماتلرگه قرهگنده، یرهدارلرنینگ احوالی هم آغیر.
منبعلر بو عایلهنینگ آتهسی عادي ایشچی بۉلیب، بیر یاقیلغی تانکریده تون و کون ایشلشینی بیلدیرگن.
حادثه صادر بۉلگن پیتده عایله باشلیغی اویده بۉلمهگن و ایش جاییده یاقیلغی تانکریده بۉلگن.
حاضرگچه اوشبو دهشتلی حادثهنی صادر اېتگن شخصلر و قاتللیک سببلری انیقلنمهگن.
محلي طالبان رسميلری هم بو واقعه حقیده حاضرچه رسمي بیانات بېرمهگن.
مملکتنینگ تورلی منطقهلریده، اینیقسه عیاللرگه قرشی سِرلی قاتللیکلر کۉپهیگنی ایتیلماقده.
کېچه کابلدن ایکّی عیال نینگ، قندهاردن اېسه بیر عیالنینگ جسدی تاپیلگن بۉلیب، اولر هم سِرلی طرزده اۉلدیریلگن اېدی.
کۉپچیلیک حاللرده بوندهی واقعهلرنی صادر اېتگنلرنینگ شخصی و قاتللر آشکار قیلینمهیپتی.
