امریکا اوردوسی مرکزی قوماندانلیگی (سنتکام) باشلیغی برد کوپرنینگ ایتیشیچه، امریکا قۉشمه ایالتلری هنوز افغانستاندن کېلیب چیقهیاتگن ترورچیلیک فعالیتلرینی کوزهتیب بارماقده و اونی «منطقوي همکارلیکلر مجموعهسی» آرقهلی جلولهماقده.
برد کوپر پنجشنبه کونی (۲۴-ثور) امریکا سنا مجلسیده جواب بېریش اوچون قتنهشیب، افغانستان توپراغیدن کېلیب چیقهیاتگن ترور تهدیدلری هنوز موجودلیگینی ایتدی.
سنتکام قوماندانی شوندهی دېدی: «افغانستان توپراغیدن کېلیب چیقهیاتگن ترور تهدیدلری قۉشمه شتاتلرنینگ منطقهدهگی شریکلری بیلن همکارلیگی اوچون هنوز مهم عامل بۉلیب قالماقده.»
اونینگ قۉشیمچه قیلیشیچه، «بیزنینگ مرکزي آسیادهگی همکارلریمیز افغانستان حدودیدن کېلیب چیقهیاتگن ترور تهدیدلرینی خواطر بیلن کوزهتماقده.»
برد کوپر پاکستاننی هم تروریزمگه قرشی کورهشده امریکانینگ شېریگی صفتیده تیلگه آلیب، شوندهی دېدی: «پاکستان تروریزمگه قرشی کورهشدهگی مهم شریک بۉلیب، منطقهده داعش خراسانگه قرشی کورهشده اساسي رۉل اۉینهیدی.»
بو آرهده طالبلر افغانستان حدودیدن منطقه و دنیا دولتلریگه قرشی ترور تهدیدلری برطرف اېتیلگنینی دعوا قیلیب، مملکتده هېچ قندهی خارجي ترور گروهی فعالیت یوریتمهیاتگنینی اَیتماقده.
طالبان سۉزلاوچیسی ذبیحالله مجاهد اینیقسه داعشنینگ افغانستاندهگی موجودلیگینی بیر نېچه بار رد اېتیب، «بو گروه افغانستانده مغلوبیتگه اوچرهگچ، بیزنینگ قۉشنیلریمیز توپراغیده اویه قورگن،» دېگن.
اما داعش وقتی-وقتی بیلن افغانستان ایچیدهگی هجوملر اوچون جوابگرلیکنی اۉز ذمّهسیگه آلماقده و بیرلشگن ملتلر تشکیلاتیگه علاقهدار ادارهلر هم اوشبو گروهنینگ موجودلیگینی تصدیقلهماقده.
تخمیناً اوچ آی آلدین بیرلشگن ملتلر تشکیلاتینینگ ترورچیلرگه قرشی کۉرهش مسوولی الکساندر زوئف، افغانستاندهگی داعش-خراسان بۉلینمهسی هنوز «منطقه و اوندن تشقریدهگی اېنگ جدّي تهدیدلردن بیری» اېکنینی ایتگن اېدی.
