محلي منبعلر کابل و قندهارده اوچ عیال نینگ جسدی تاپیلگنی حقیده خبر بېرماقده.
منبعلرگه کۉره، بوگون (پنجشنبه، ۲۴-حوت) کابل شهرینینگ ۱۷-ناحیهسیده ایکّی عیالنینگ قانگه بېلنگن جسدی تاپیلگن.
ایتیلیشیچه، بو جسدلر «مارشال فهیم یۉلی» اطرافیدهگی تېپهلیک اېتهگیدن محلي اهالی تامانیدن انیقلنگن.
منبعلرنینگ خبریگه کۉره، اوشبو عیاللر تخمیناً۱۹ و۳۵یاشده بۉلگن، بیراق اولرنینگ شخصی حاضرچه انیقلنمهگن.
شونینگدېک، باشقه منبعلر قندهار ولایتینینگ «نساجي» حدودیدن هم بیر عیالنینگ جسدی تاپیلگنینی بیلدیرگن.
اولرنینگ ایتیشیچه، جسدده موتر اوریب کېتگنیگه اۉخشش ایزلر موجود بۉلگن.
محلي اهالی عیالنینگ جسدینی شخصینی انیقلش مقصدیده میرویس شفاخانهسیگه آلیب بارگن.
حاضرچه اوشبو عیاللرنینگ اۉلیمیگه سبب بۉلگن عامللر و جنایتچیلر کیملیگی نامعلوملیگیچه قالماقده.
طالبلرنینگ کابل و قندهاردهگی محلي رسميلری هم بو واقعه یوزهسیدن حاضرچه ایضاح بېرمهگن.
طالبلر حاکمیتگه قَیتگنیدن بېری مملکتنینگ تورلی حدودلریده سِرلی قاتللیکلر سېزیلرلی درجهده کۉپهیگنی ایتیلماقده.
بو قاتللیکلرنینگ کۉپچیلیگی اوچون «نامعلوم قوراللی شخصلر» جوابگر دېب کۉرسهتیلهدی، بیراق طالبان کمدن-کم حاللرده اولرنی انیقلش یاکه جزالش حقیده معلومات بېرهدی.
