طالبلرنینگ «کیفیت و معیار ادارهسی» هندنینگ «تیسیآرسی» شرکتی بیلن مرکز و مملکتدهگی تۉقّیزته باجخانه بندریده «استندرد لابراتوار کمپلکسلر» قوریش بۉییچه شرطنامه امضالهدی.
اوشبو شرطنامه بوگون (چهارشنبه،۲۳ ثور) طالبلر باش وزیرینینگ اقتصادی اۉرین باسری عبدالغنی برادر اشتراکیده امضالنگن.
باش وزیر اقتصادي اۉرینباسری ادارهسی معلوماتیگه کۉره، شرطنامه قیمتی۴۶ میلیون دالردن آرتیق بۉلیب، اونگه موافق هند شرکتی کېلگوسی بېش ییل دوامیده مملکت مرکزی و تۉقّیزته بندریده استندرد لابراتوار کمپلکسلرینی تشکیل اېتهدی.
شونینگدېک، پودرتچی کمپنی باجخانه بندرلریده زمانهوي اسکونهلرنی یېتکزیب بېریش و اۉرنهتیش، موجود جهازلرنی ترمیملش همده «کیفیت و معیارنی باشقریش» خادملرینینگ امکانیتلرینی آشیریش اوچون خارجي متخصصلرنی جلب اېتیشی رېجهلشتیریلگن.
اداره معلوماتیده ایتیلیشیچه، اوشبو کېلیشوو اساسیده خادملر اوچون ایچکی و تشقی اۉقوو دستورلری هم تشکیل اېتیلهدی، شونینگدېک، خلق ارا صفت سرتیفیتکلرینی (ISO) آلیش جریانی هم عملگه آشیریلهدی.
طالبلر ۲۰۲۱ییلده حاکمیتنی قَیته اېگهلهگنیدن بېری مملکت باجخانه بندرلریده نظارتنی کوچهیتیرگن و بیر نېچه بار وارد قیلینهدیگن تاورلرنی قَیتریب یوبارگن.
بیراق تاورلری قَیتریلگن اَیریم دولتلر طالبان تامانیدن عملگه آشیریلهیاتگن صفت تېکشیروولری خلقارا ستندردلرگه ماس اېمسلیگینی بیلدیرگن.
