امریکانینگ نینگ افغانستان تینچلیک مسألهلری بۉییچه سابق مخصوص وکیلی زلمی خلیلزاد، سۉنگّی۴۰ ییل دوامیده پاکستان سیاستی بیر وقتنینگ اۉزیده امریکا بیلن دۉست بۉلیب، شو بیلن بیرگه اونگه خیانت قیلیشگه هم اساسلنگن بۉلگنینی ایتدی.
خلیلزاد بوگون (چهارشنبه،۲۳ ثور) ایکس اجتماعی ترماغیده یازیشیچه: «سۉنگّی۴۰ ییل دوامیده امریکا بیلن بیر وقت نینگ اۉزیده همکارلیک قیلیش و عینِ پیتده اونگه قرشی حرکت قیلیش پاکستان سیاستی نینگ بیر قِسمی بۉلیب کېلگن.»
اونینگ سۉزلریگه کۉره، پاکستان امریکاگه هستوي قورال ایشلب چیقمسلیک حقیده وعده بېرگن، بیراق عملده اونی جدّي روشده ایشلب چیقیش یۉلیدن بارگن.
اونینگ ینه قۉشیمچه قیلیشیچه، پاکستان ۲۰۰۱-ییل۱۱-سپتامبر واقعهلریدن کېین افغانستاندهگی عملیاتلرده امریکاگه یاردم بېریشینی بیلدیرگن بۉلسه-ده، بیر وقت نینگ اۉزیده امریکاگه قرشی جنگ قیلهیاتگن کوچلرگه یعنی طالبلرگه هم یاردم کۉرسهتگن.
خلیلزادنینگ ایتیشیچه: «اونوتمسلیک کېرهککی، پاکستان اسامه بن لادیننی یشیریب کېلگن، بیز اونی آخر-عاقبت اولرنینگ حربي اۉبژېکتلری یقینیده تاپگنیمیزگچه و مخصوص کوچلریمیز اونی یۉق قیلمهگونچه.»
او بو فکرلرنی امریکا و ایران اۉرتهسیدهگی مذاکرهلر جریانیده اېران اوچاقلری پاکستانده جایلشتیریلگنی حقیدهگی خبرلرگه جوابن بیلدیرگن.
خلیلزادنینگ تأکیدلشیچه: «پاکستان امریکا و ایران اۉرتهسیدهگی مذاکرهلرنی آسانلشتیرهیاتگن و امریکا جمهور رییس ترامپگه یقینلشیشگه حرکت قیلهیاتگن بیر پیتده، حربي رهبرلر ایران حربي اوچاقلریگه یشیرین طرزده پاکستاندهگی هوا بازهسیده جایلشیشگه رخصت بېرگن.»
اونینگ قۉشیمچه قیلیشیچه: اگر بو معلومات تصدیقلنسه، بونگه هېچ کیم حیران بۉلمسلیگی کېرهک.
بو هفته اسبیاس تلویزیونینینگ خبر بېریشیچه، اپرېل آیی نینگ باشلریده ایران بیر نېچته اوچاقلرینی پاکستاننینگ رَاولپیندی یقینیدهگی نورخان هوا میدانیگه کۉچیرگن بۉلیب، اولرنی امریکا و اسرایل هجوملریدن حمایه قیلیش مقصد قیلینگن. بیراق پاکستان حکومتی بو خبرلرنی درحال رد اېتگن.
