بیرلشگن ملتلر تشکیلاتینینگ افغانستاندهگی نمایندهلیگی (یوناما) اۉزینینگ ینگی گزارشیده افغانستاننینگ سابق عملدارلری حربي خدمتچیلریگه نسبتاً قاتللیک، اۉزباشیمچهلیک بیلن حبسگه آلیش و قییناقلر دوام اېتهیاتگنینی معلوم قیلدی.
بوگون (سهشنبه، ۲۲-ثور) نشر قیلینگن گزارشده یوناما جاري ییل نینگ ۱-جنورییدن ۳۱-مارچیگچه کمیده بېش نفر سابق افغانستان حربيسینینگ اۉلدیریلگنینی قید اېتگنینی بیلدیردی.
بیرلشگن ملتلر تشکیلاتینینگ افغانستاندهگی یاردم ادارهسی شو دور ایچیده سابق عملدارلر و حربيلرگه نسبتاً کمیده 23 ته اۉزباشیمچهلیک بیلن حبسگه آلیش و قماققه آلیش حالتی همده تۉقّیزته قییناق و یامان معامله حالتینی قید اېتگنینی معلوم قیلگن.
یوناما، شونینگدېک، دېپورت قیلینگنیدن سۉنگ افغانستانگه قَیتگن سابق عملدارلر و حربيلر هم انسان حقوقلری بوزیلیشیگه دوچ کېلیشده دوام اېتهیاتگنینی بیلدیرگن.
تشکیلات گزارش دوریده یقینده مجبوري روشده افغانستانگه قَیتریلگن سابق حکومت کوچلری و عملدارلریگه قرشی صادر اېتیلگن کمیده سکّیزته انسان حقوقلری بوزیلیشی حالتینی حجتلشتیرگنینی ایتدی.
یوناما معلوماتیگه کۉره، بو حالتلر مذکور شخصلر افغانستانگه قَیتگنیدن بیر نېچه ساعتدن آلتی آیگچه بۉلگن مدت ایچیده صادر بۉلگن.
گزارشده ایتیلیشیچه، جاري ییل ۷-جنوری کونی خوجه دوکوه اولسواللیگیده«حکومت طرفداری بۉلگن سابق قوراللی گروه قوماندانی اوییگه باستیریب کیرگن نامعلوم شخصلر تامانیدن آتیب اۉلدیریلگن.»
یونامانینگ قۉشیمچه قیلیشیچه: «او طالبان حاکمیتنی اېگهلهگنیدن کېین ایرانگه قاچگن اېدی، بیراق اۉلدیریلیشیدن تخمیناً بېش آی آلدین مجبوري روشده افغانستانگه قَیتریلگن.»
یشاووچیلرنی تعقیب قیلیش و مذهبی اېرکینلیک بوزیلیشی
یوناما جاري ییل نینگ دستلبکی اوچ آییده طالبان نینگ «امر به معروف و نهي از منکر» خادملری تامانیدن عیاللر و اېرککلرگه نسبتاً کمیده۳۳۶ ته «اۉزباشیمچهلیک بیلن حبسگه آلیش و قماققه آلیش» همده۵۹ ته یامان معامله حالتینی قید اېتگنینی معلوم قیلدی.
حساباتگه کۉره، بو حالتلر اساسن «سقالنی قیسقرتیریش، غربانه ساچ تورمهگی، موسیقی تینگلش یاکه ترقهتیش همده حجاب قاعدهلرینی بوزگنلیک» بیلن باغلیق بۉلگن.
یوناما ینه طالبلرنینگ «امر به معروف و نهي از منکر» کوچلری، استخبارات اۉرگانلری، تومن حاکملری و حج و اوقاف باشقرمهسی کمیده سکّیز ولایتده شیعهلرگه رمضان هییتینی طالبان بېلگیلهگن سنهده اېمس، بلکه شیعه تقویمیگه موافق نشانلهمسلیک حقیده بویروق بېرگنینی بیلدیرگن.
گزارشده ایتیلیشیچه، بیر ولایتده طالباننینگ حج و اوقاف باشقرمهسی وکیللری طالبان بېلگیلهگن سنهده هییتنی نشانلشگه راضی بۉلمهگن بیر گروه شیعه روحانيلرینی حبسگه آلگن.
یوناما حساباتیگه کۉره، طالبان یېتکرمهلر و ژورنالیستلر فعالیتیگه کېنگ کۉلملی چېکلاولر جاري اېتیشده دوام اېتگن و سۉنگگی اوچ آیده کمیده ایکّی میدیا فعالیتینی تۉختهتگن.
جسماني جزالر
یونامانینگ معلوماتیگه کۉره، طالبان جاري ییل نینگ۱-جنوریسیدن ۳۱-مارچ گچه کمیده۳۱۲ کیشینی عامه آلدیده قمچیلهگن.
گزارشده قید اېتیلیشیچه، اولر آرهسیده۲۶۹ اېرکک،۳۹ عیال و تۉرت نفر اۉغیل باله بۉلگن.
یوناما مثال طریقهسیده،۵-فبروری کونی بگرام اولسواللیگیده طالبان بېش اېرکک و اوچ عیالنی «ناقانوني مناسبتلرده بۉلگنلیک» عیبی بیلن عامه آلدیده قمچیلهگنینی کېلتیرگن.
گزارشگه کۉره، اولرنینگ هر بیریگه۳۹ ضربه قمچی اوریلگن. شونینگدېک، ایکّی اېرکک و ایکّی عیال تۉرت ییلگه، ینه ایکّی اېرکک و بیر عیال ایکّی ییلگه، باشقه بیر اېرکک اېسه بیر ییلگه قماق جزاسیگه حکم قیلینگن.
یونامانینگ تأکیدلشیچه، عامهوي قمچیلش مراسمی طالبلرنینگ پروان استنیاف محکمهسی رئیسی، «امر به معروف و نهي از منکر» باشقرمهسی، استخبارات باشقرمهسی وکیللری همده محلي اهالی اشتراکیده عملگه آشیریلگن.
طالبان حاضرچه یونامانینگ انسان حقوقلری بۉلیمینینگ ینگی حساباتیگه مناسبت بیلدیرمهگن. بیراق اولر اوّل هم افغانستاندهگی انسان حقوقلری حالتی حقیدهگی حساباتلرنی رد اېتیب کېلگن.
