طالبلر پاکستاننینگ خیبر پختونخواه ایالتیدهگی بنو اولسواللیگیده جایلشگن پولیس پوستهسیگه هجوم افغانستان توپراغیدن رېجهلشتیریلگنی حقیدهگی دعوالرینی «اساسسیز» دېب رد اېتدی.
ذبیحالله مجاهد بوگون (سهشنبه، ۲۲-ثور)ایکس اجتماعي ترماغیده نشر قیلگن بیاناتیده شوندهی یازدی: «افغانستان اسلام امیرلیگی (طالبان) پاکستان رسميلرینینگ بنو پولیس مرکزیگه هجوم افغانستانده رېجهلشتیریلگنی حقیدهگی سۉنگّی بیاناتلرینی اساسسیز دېب حسابلهیدی و رد اېتهدی.»
اونینگ قۉشیمچه قیلیشیچه، طالبلر «معمالرنی عیبلاولر، تهدیدلر و حسسي موضعلر آرقهلی اېمس، بلکه اۉزارا توشونیش، حرمت و حقیقي همکارلیک یۉلی بیلن حل اېتیش ممکن» دېب بیلهدی.
طالبلر سۉزلاوچیسی ینه بیر بار بو گروه نینگ موضعینی تکرارلب، «افغانستان توپراغیدن هېچ بیر دولتگه قرشی فایدهلنیلمسلیگینی و منطقه خوفسیزلیگی همده برقرارلیگیگه ضرر یېتکزهدیگن بوندهی حرکتلرگه هېچ کیمگه رخصت بېریلمسلیگینی» تأکیدلهدی.
پاکستان تشقی ایشلر وزیرلیگی بنو پولیس پُوستهسیگه اویوشتیریلگن هجوم یوزهسیدن ناراضیلیک بیلدیریب، تیناوون طالبلرنینگ اسلام آباددهگی اېلچیخانهسی کارداری سردار احمد شکیبنی چقیرتیرگن اېدی.
پاکستان تشقی ایشلر وزیرلیگی «اوشبو هجوم بۉییچه باتفصیل تېرگاو، تۉپلنگن دلیللر و تخنیکي معلوماتلر هجوم افغانستانده جایلشگن ترورچیلر تامانیدن رېجهلشتیریلگن و باشقریلگنینی کۉرسهتماقده» دېب بیان قیلگن اېدی.
وزیرلیک بو هجوم آرتیده «فتنهی خوارج» تورگنینی بیلدیرگن. بو اتَمه پاکستان حکومتی تامانیدن تحریک طالبان پاکستان (تیتیپی) اوچون ایشلهتیلهدی.
فتحخیل پولیس پوستهسی شنبه آقشامیده خودکوشلیک و قوراللی هجومگه اوچرهگن بۉلیب، پاکستان تشقی ایشلر وزیرلیگی معلوماتیگه کۉره، کمیده۱۵ نفر پولیس خادیمی هلاک بۉلگن و ینه تۉرت کیشی، جملهدن بیر تینچ اهالی یرهلنگن.
