تاجیکستان خوفسیزلیک دولت کمیتهسی افغانستانلیک اۉنلب مهاجرلرنینگ عامهوي دېپورتی یوزهسیدن بیلدیریلگن تنقیدلرگه جواب بېریب، بو چارهگه سبب بۉلگن عامللرنی توشونتیردی.
مذکور کمیتهنینگ جماعتچیلیک بیلن علاقهلر مرکزی خاور دولت اخبارات آژانسیده نشر قیلگن بیاناتیده دېپورت قیلینگن شخصلر تاجیکستان قانونلرینی بوزگنینی معلوم قیلگن.
بیاناتده ایتیلیشیچه، دېپورت قیلینگنلر آرهسیده گیاهوند مادّهلر قاچاقچی بۉییچه۶۷۰ ته، حجتلرنی قلبهکیلشتیریش بۉییچه۵۹۴ ته، فاحشهلیک و قمار مرکزلری تشکیل اېتیش بۉییچه۴۵ته، ترورچی پارتیهلر و گروهلر بیلن علاقهدارلیک بۉییچه۳۲ ته، قۉپارووچیلیک گروهلری بیلن باغلیقلیک بۉییچه۲۵ ته همده بالهلرگه نسبتاً جنسي کرکتردهگی زۉرآورلیک بۉییچه۱۵ ته جنایت اوچون حکم قیلینگن شخصلر بار.
بیراق یقینده قنچه افغانستانلیک مهاجر دېپورت قیلینگنی و اوشبو جنایتلر قَیسی دورگه تېگیشلی اېکنی آچیقلنمهگن.
مذکور ادارهنینگ قۉشیمچه قیلیشیچه، سۉنگّی حالتلردن بیریده، 30-اپریل کونی افغانستانلیک یاش ییگیت محمدعمر رحمانی خجند شهریده اۉز شأنینی حمایه قیلیشگه اورینگن یاش تاجیک عیالینی شفقتسیزلرچه اۉلدیرگن.
تاجیکستان خوفسیزلیک دولت کمیتهسی بیاناتیده شوندهی دېییلهدی: «افغانستان وطنداشلرینینگ بوندهی جنایي حرکتلری و مملکت خوفسیزلیگیگه تۉغریدن-تۉغری تهدید سالووچی دهشتلی قیلمیشلری تېگیشلی اۉرگانلرنی قانون اوستوارلیگی و اهالینینگ آسایشتهلیگینی تأمینلش اوچون انیق چارهلر کۉریشگه مجبور قیلدی.»
بیاناتده ینه تاجیکستان افغان خلقی نینگ تینچ و آسایشته حیاتی همده ترقیاتینی قۉللب-قوّتلشی، سۉنگگی 35 ییل دوامیده افغانستانلیک مهاجرلرنینگ اوچ نسلی اوچون ایکّینچی وطن بۉلیب کېلگنی و اولرنینگ حقوق همده اېرکینلیکلریگه حرمت بیلن یاندهشگنی تأکیدلنگن.
کمیته معلوماتیگه کۉره: «حاضرگی وقتده تاجیکستان توپراغیده اۉن مینگدن آرتیق عایله، یعنی اۉن مینگلب افغانستان فقرالری یشب و ایشلهماقده. اولر اوچون یشش و محنت قیلیشگه قولهی شرایطلر یرهتیلگن همده تاجیک خلقی و دولت اۉرگانلری اولرگه نسبتاً عدالتلی مناسبتده بۉلماقده.»
ادارهنینگ تأکیدلشیچه، دېپورت قیلینگن افغانستانلیک مهاجرلر«یشش، ایشلش، تعلیم آلیش، خوفسیزلیک و آسایشتهلیک اوچون برچه امکانیتلر یرهتیلگنیگه قرهمهی، مملکت قانونلرینی جدّي روشده بوزگن شخصلر» بۉلگن.
تاجیکستان خوفسیزلیک دولت کمیتهسی اوشبو بیاناتنی فقرالرنینگ تنقیدلری همده افغانستان جمهور رییسلیگیگه سابق نامزاد محمد حکیم تورسننینگ خجند شهریدن قریب 250 نفر افغانستانلیک مهاجرنینگ عامهوي دېپورتیگه قرشی مراجعتیگه جوابن اعلان قیلگن.
