ریچارد بنت جنیواده بۉلیب اۉتگن «حسابدارلیک، حقیقت و یرهشوو؛ افغانستانده قانون باشقرووگه قَیتیش اساسلری» ناملی ییغیلیشده افغانستان اوچون «مستقل حسابدارلیک میکانیزمی»نی یرهتیش بۉییچه تفصیلاتلرنی معلوم قیلدی.
بیرلشگن ملتلر تشکیلاتینینگ افغانستان بۉییچه مخصوص گزارشگری تیناوون (دوشنبه، ۲۱-ثور) اوشبو ییغیلیشده ایتیشیچه، بیرلشگن ملتلر تشکیلاتینینگ انسان حقلری کېنگشی تامانیدن تصدیقلنگن مذکور میکانیزمنی تشکیل اېتیش حقیدهگی قطعنامه وقت بیلن چېکلنمهگن. اونینگ تأکیدلشیچه، عیناً شو جهت اونی باشقه شونگه اۉخشش قطعنامهلردن اجرهتیب تورهدی.
اونینگ قۉشیمچه قیلیشیچه، اوشبو میکانیزمنینگ اساسي وظیفهسی افغانستانده انسان حقلری بوزیلیشی بۉییچه برچه تامانلرگه عاید دلیللرنی تۉپلشدن عبارت بۉلهدی.
بیراق بنتنینگ ایتیشیچه، اوشبو میکانیزم آرقهلی تشکیل اېتیلهدیگن «حقیقتنی انیقلش کمیسیونی»نینگ وظیفهسی فقط دلیل ییغیش بیلن چېکلنمهیدی. کمیسیون مقصدلرگه اېریشیش و ثمرهلی حسابدارلیکنی تأمینلش اوچون کېنگ قمراولی همده قۉشمه حسابات هم تیارلهیدی.
بیرلشگن ملتلر تشکیلاتی مخصوص گزارشگری شونینگدېک، یقین کونلرده افغانستان مستقل حسابدارلیک میکانیزمی رهبری تعیینلنیشینی و بو بارهده کۉپراق ملاقات امکانیتلری یرهتیلیشینی بیلدیردی.
افغانستانلیک مدنی جمعیتی و انسان حقوقلری فعاللری سۉنگگی ییللرده مملکت اوچون مستقل حسابدارلیک میکانیزمینی یرهتیش همده انسان حقوقلری بوزیلیشی حالتلرینی اۉرگنیش بۉییچه سعی-حرکت آلیب بارهیاتگن اېدی.
بیرلشگن ملتلر تشکیلاتینینگ انسان حقلری کېنگشی ۲۰۲۵-ییل ۶-آکتبر کونی افغانستان اوچون «مستقل حسابدارلیک میکانیزمی»نی تشکیل اېتیش حقیدهگی قطعنامهنی قبول قیلگن.
جنیوادهگی افغانستان وکالتخانهسی حساباتیگه کۉره، اوشبو قطعنامه آواز بېریشسیز و هېچ قندهی قرشیلیکسیز تصدیقلنگن.
