خلق ارا عفو تشکیلاتی طلوع نیوزنینگ خبرچیسی منصور نیازي و عمران دانش همده پیگرد خبرگزارلیگی مسوول محرری جاوید نیازینینگ طالبلر استخباراتی تامانیدن کابلده حبسگه آلینیشی یوزهسیدن چوقور خواطر بیلدیردی.
مذکور تشکیلات بوگون (دوشنبه، 21 ثور) اعلان قیلگن بیاناتیده ژورنالیستلرنینگ حبسگه آلینیشی اۉزباشیمچهلیک بیلن عملگه آشیریلگنینی تأکیدلب، بو حرکتلر افغانستاندهگی ژورنالیستلر و یېتکرمه خادملریگه قرشی آلیب باریلهیاتگن «کېنگراق و دواملی قۉرقیتیش همده قصاص آلیش سیاستی»نینگ بیر قِسمی بۉلیب کۉرینهیاتگنینی بیلدیردی.
عفو خلق ارا تشکیلاتینینگ قۉشیمچه قیلیشچه، «اۉزباشیمچهلیک بیلن آزادلیکدن محروم قیلیش و مجبوري یۉقالیش حالتلری حبسگه آلینگنلرنینگ خوفسیزلیگی و سلامتلیگی یوزهسیدن جدّي خواطرلرنی، جملهدن قییناق و باشقه یامان معامله خوفینی کېلتیریب چیقرهدی.»
تشکیلات طالباندن اوشبو اوچ ژورنالیستنینگ تقدیری و قهیېرده سقلنهیاتگنینی زودلیک بیلن آشکار قیلیشنی، اولرگه وکیل مدافع و عایله اعضالری بیلن اوچرهشیش امکانینی تأمینلشنی طلب قیلدی.
شونینگدېک، اولر «خلقارا عدالتلی محکمه ستندردلریگه ماس کېلهدیگن محکمه جریانیده انیق جنایي عیبلاو» بیلن عیبلنمسه، آزاد قیلینیشی کېرهکلیگینی بیلدیردی.
افغانستان ژورنالیستلر مرکزی معلوماتیگه کۉره، طالبان استخباراتی جاوید نیازينی اۉتگن هفته چارشنبه کونی چقیرتیرگندن کېین حبسگه آلگن. مرکزنینگ ایتیشیچه، منصور نیازي پنجشنبه کونی کابلنینگ کارته چهار منطقهسیده قۉلگه آلینگن، عمران دانش اېسه هفته باشیده حبسگه آلینگن.
طلوع نیوز خصوصی تلویزیونی هم عمران دانش و منصور نیازينینگ طالبان تامانیدن حبسگه آلینگنینی تصدیقلهگن، بیراق واقعه تفصیلاتلری حقیده قۉشیمچه معلومات بېرمهگن.
حاضرچه ژورنالیستلر نیمه سببدن حبسگه آلینگنی و قهیېرده سهقلنهیاتگنی نامعلوم بۉلیب قالماقده.
