زلمی خلیلزاد آنهلر کونی مناسبتی بیلن قیلگن مراجعتیده طالباننی آنهلرنینگ تعلیم آلیشی جمعیت کېلهجگی اوچون مهم اېکنیگه اعتبار قرهتیشگه چقیردی.
امریکادهگی خلیلزاد یکشنبه کونی آنهلر کونی مناسبتی بیلن ایکس اجتماعی ترماغیده یازگن پیامیده، او و اونینگ خاتینی شریل افغانستان آنهلری حقیده اۉیلهیاتگنینی بیلدیردی.
او افغانستان رهبرلریدن، طالباندن علمي دلیللرگه کۉره، جمعیت و ملتلرنینگ رونقی آنهلرنینگ ساغلیگی همده بیلیمیگه بېواسطه باغلیق اېکنینی اونوتمسلیکنی سۉردی.
خلیلزادنینگ تأکیدلشیچه، «تعلیم آلگن آنه باله نینگ ایلک و اېنگ تأثیرچن استاذی دیر. او کسللیکلرنی انیقلهی آلهدی، فرزندیگه تۉغری آزیقلنیشنی تأمینلهیدی همده بالهنینگ ایلک ییللردهگی مییه رواجلنیشینی قۉللب-قوّتلهیدی. نتیجهده باله جمعیتده بیلیملی و صلاحیتلی انسان بۉلیب اولغیهدی.»
امریکانینگ سابق نمایندهسی بالهلر نکاحینینگ آلدینی آلیش ضرورلیگیگه هم تۉختهلیب، موفقیتلی حاملهدارلیک اوچون قیزلر ایلک حاملهدارلیکدن آلدین جسماناً تۉلیق وایهگه یېتگن بۉلیشی کېرهکلیگینی ایتدی. بو اېسه آنه و چقهلاق سلامتلیگینی تأمینلش اوچون مهم اېکنینی قید اېتدی.
طالبان۱۴۰۰ هجري-شمسي ییلی نینگ۲۴-اسده افغانستانده حاکمیتنی قَیته اېگهلهگنیدن سۉنگ، قیزلر و عیاللرنینگ آلتینچی صنفدن یوقاری تعلیم آلیشینی، بیلیم یورتلریده اۉقیشینی و حتا اَیریم طبیات یۉنهلیشلریده تحصیل آلیشلرینی تعقیقلهگن اېدی.
بیرلشگن ملتلر تشکیلاتی اېسه بیر نېچه بار آگاهلنتیریب، عیاللر و قیزلرنینگ تعلیمدن محروم قیلینیشی اوزاق مدتده جمعیت سلامتلیگیگه ضرر یېتکزیشی، مجبوري و وایهگه یېتمهگنلر نکاحینینگ کۉپهییشیگه همده اېکسترېمیزم کوچهییشیگه سبب بۉلیشی ممکنلیگینی بیلدیرگن.
